Qədim Misir sivilizasiyasının simvolu olan Giza piramidalarımın altındakı sirli strukturlar elm dünyasında böyük marağa səbəb olub. Yeni radar tədqiqatları, yüzlərlə metr dərinlikdə yerləşən və indiyədək məlum olmayan nəhəng bir yeraltı kompleksin mövcudluğuna işarə edir. 

"EDnews" xəbər verir ki, Gizada aparılan araşdırmalarda, səthdən təxminən 600 metr dərinlikdə uzanan geniş yeraltı şəbəkənin varlığına dair sübutlar ortaya çıxıb. İtaliyalı alimlərdən ibarət bir qrup Gizadakı üç əsas piramidanı birləşdirən bir yeraltı şəhər sisteminin izlərini tapdıqlarını açıqlayıb.

Araşdırmalar əsasən daha öncə də diqqət çəkmiş Kefren və Menkaure piramidalarının altındakı strukturlara yönəlib. İtalyan komandası mart ayında Kefrenin altında sütunlara bənzər quruluşların kəşf edildiyini və bunların yalnız başlanğıc olduğunu bildirib. Eyni xüsusiyyətlərin Menkaure piramidanın altında da olduğunu iddia ediblər.

Stratçide Universitetindən radar mütəxəssisi Filippo Biondi "Daily Mail"ə verdiyi açıqlamada, iki piramidanın altındakı strukturlar arasında əlaqənin demək olar ki, qəti olduğunu bildirib. Onun sözlərinə görə, radar nəticələri Menkaurenin altında da oxşar sütunlu quruluşların olduğunu göstərir və bu, Giza piramidaların yalnız daha böyük və təşkilatlanmış yeraltı kompleksin səthdəki hissəsi olduğunu göstərir.

Biondi əlavə edib ki, bu strukturlar yeraltında tunellərlə bir-birinə bağlanan böyük tikililərdən ibarət ola bilər. Tomoqrafiya və radar təhlilləri bu strukturların ölçülərinin əvvəlki təsəvvürlərdən daha böyük olduğunu və indiyədək görünməmiş bir memarlıq planı ehtiva etdiyini ortaya qoyub.

Tədqiqat qrupu bu strukturların hava, su, od və torpaq kimi təbii elementlərlə bağlı funksional və ya ayin məqsədli məkanlar ola biləcəyini düşünür.

İtalyan tədqiqatçılar bu strukturların, təxminən 12 min 800 il əvvəl Yerə çırpılan bir komet nəticəsində məhv olmuş qabaqcıl bir tarixdən öncəki sivilizasiyanın izləri ola biləcəyini iddia edirlər. Kaliforniya Universitetindən geoloq Ceyms Kennett də bu nəzəriyyəyə dəstək verir və eyni dövrdə Şimali Amerikadakı Klovis mədəniyyətinin qəfil yox olduğunu xatırladır.

Kennett qeyd edir ki, həmin dövrdə baş verən böyük əhali itkisi bir neçə əsr davam edib və sonradan fərqli bir mədəniyyət kimi yenidən ortaya çıxıblar. Onun fikrincə, Misirdə də bənzər bir hadisənin baş vermiş olub-olmadığını söyləmək çətindir, lakin Suriyadakı Əbu Hureyra bölgəsində aşkar edilən çarpma izləri inandırıcıdır.

Qədim sivilizasiyalar üzrə tədqiqatçı Endryu Kollins Gizanın təxminən 1280 km cənubundakı Edfu məbədində yer alan hiyeroqliflərin çox qədim bir tufan fəlakətindən bəhs etdiyini bildirir. Əfsanəyə görə, bu tufan "Ən yaşlılar” adlı sivilizasiyanı məhv etmişdi. Yazılarda bu sivilizasiyanın qaranlığa qərq olduğu və "düşmən ilan” adlı simvolik bir güc tərəfindən udulduğu qeyd olunur.

Kollins bu "ilan” obrazının komet metaforu ola biləcəyini və bu hadisənin yeraltı strukturlarla birbaşa əlaqəli olduğunu düşünür. Onun fikrincə, bu strukturlar "Ruhun yeraltı dünyası” adlanan müqəddəs əşyaların qorunduğu məkanla üst-üstə düşür və efsanəvi "Yaradıcılış adası”nın bir hissəsi ola bilər.

Kollins eyni zamanda, tarixin bəzi inkişaf etmiş qədim mədəniyyətləri nəzərə almadığını vurğulayır. Rusiyadakı Sungir və Kostenki bölgələrində yaşamış Qravettian xalqları 30 min il əvvəl ayın hərəkətlərinə əsaslanan memarlıq quruluşları inşa etmiş, xüsusi tikilmiş geyimlər geymiş və əkinçiliklə məşğul olmuşdular.

"Onlar orta əsr insanları kimi görünür və davranırdılar. Bu da göstərir ki, insanlıq tarixi düşündüyümüzdən daha qədim və inkişaf etmiş ola bilər”, deyə o bildirib.

Bütün bu iddialar elmi dairələrdə ciddi tənqidə səbəb olub. Misirin tanınmış arxeoloqlarından Dr. Zahi Havass bu tapıntıları "elmdən kənar” hesab edir. O bildirib ki, yerin bu qədər dərinliyinə nüfuz edə biləcək radar texnologiyası hələ mövcud deyil və bu tədqiqatlar yalnız fərziyyələrə əsaslanır.

Bununla belə, tədqiqatçılar geri çəkilmir. İddialara görə, Kefren piramidası altındakı strukturlar spiral şəkildə düzülmüş və səkkiz əsas sütunu əhatə edən təqribən 600 metrdən uzun yeraltı tunellərdən ibarətdir. Eyni xüsusiyyətlərin Menkaure piramidasının altında da olduğu bildirilir. Menkaurenin daha kiçik olması səbəbindən sütunların sayı az olsa da, strukturların funksional olaraq oxşar olduğu vurğulanır.

Bu yeraltı şəhərin mövcudluğu hələ rəsmi elmi jurnallarda təsdiqlənməyib və arxeologiya aləmində böyük müzakirələrə səbəb olub. Lakin bir şey aydındır: Giza piramidalarının sirləri hələ tam açılmayıb. Əgər bu iddialar təsdiqlənsə, insanlıq tarixinə dair bildiklərimiz kökündən dəyişə bilər.