“Ermənistanın Azərbaycan ərazisini işğal etməsi beynəlxalq hüquqa ziddir”.
Bunu Almaniya Parlamentinin (Bundestaq) deputatı Mark Huaptmann "Eurasia Diary" portalına özəl müsahibəsində deyib.
Eurasia Diary: Azərbaycan və Almaniya arasında münasibətləri necə qiymətləndirirsiniz?
Mark Hauptmann: 2016-ci ildə Azərbaycan və Almaniya hökumət nümayəndələri iki dövlət arasında diplomatik əlaqələrinin qurulmasının 20 illiyini qeyd etdilər. Almaniya Azərbaycan ilə əməkdaşlığı gücləndirməkdə maraqlıdır. Azərbaycan Cənubi Qafqaz regionunda vacib tərəfdaşdır. Hər iki dövlətin rəsmiləri qarşılıqlı səfərlər zamanı bir sıra məsələlərdə hərtərəfli və düzgün dailoq haqqında müzakirələr aparır. Hesab edirəm ki, Almaniya və Azərbaycan arasında münasibətlər almanların 19-cu əsrdə Göygöl regionunda məskunlaşdığı dövrdən başlayır.
Eurasia Diary: Ölkələr arasında iqtisadi əlaqələrin gələcək perspektivləri ilə bağlı nə deyə bilərsiniz?
Mark Hauptmann: Azərbaycan regionda Almaniyanın vacib iqtisadi əməkdaşıdır. Enerji sahəsində ümumi maraqlar üçün yatırılan investisiyalar iqtisadi əlaqələrimizin güclənməsinə zəmanət verir.
Eurasia Dairy: Bildiyiniz kimi Ermənistan hərbi qüvvələri Azərbaycan torpaqlarının 20 faizini 23 ildir işğal altında saxlayır. Ermənistanın Azərbaycana qarşı təcavüzü barədə nə deyərdiniz?
Mark Hauptmann: Ermənistanın Azərbaycan ərazisini işğal etməsi beynəlxalq hüquqa ziddir. Buna görə də, BMT-nin Təhlükəsizlik Şurasının qətnamələrin yerinə yetirilməsinin tərəfdarıyam. Erməni hərbi qüvvələri işğal olunmuş ərazilərdən dərhal geri çəkilməli və məcburi köçkünlər öz evələrinə qayıtmalıdır. Sülhün əldə olunması üçün münaqişənin siyasi yolla həll edilməsi vacibdir. Regionda münaqişənin diplomatik cəhətdən yoluna qoyulması üçün ATƏT Minsk Qrupunun fəaliyyətinin davam etdirilməsinə ehtiyac var. Keçmişdə Ermənistanın əməkdaşlıq etməməsi o demək deyil ki, münaqişə davam etməlidir. Regionda sülhün bərqərar olunmasına və məcburi köçkünlərin hüquqlarının qorunmasına ehtiyac var.
