Xəbər verdiyimiz kimi, bugün Azərbaycan Parlamentinin 100 illiyinə həsr edilən təntənəli iclas keçirilib.

Eurasia Diary-nin verdiyi məlumata görə, Milli Məclisin inzibati binasında təşkil edilən yubiley mərasimində Türkiyə, Səudiyyə Ərəbistanı, Gürcüstan, Əfqanıstan, Küveyt, Bəhreyn, Bosniya və Herseqovina, Bolqarıstan, Cibuti, İndoneziya, Pakistan və Oman Sultanlığı parlament sədrləri, həmçinin Rusiyanın, İranın, Macarıstanın, Polşanın, Serbiyanın, Monteneqronun, Çexiyanın, Qazaxıstanın, Özbəkistanın, Tacikistanın, Vyetnamın isə parlament sədrlərinin müavinləri qatılıblar.

Ümumilikdə isə tədbirə 150 ölkənin parlamentinin nümayəndə heyəti qatılıb.

Təntənəli iclasda ATƏT Parlament Assambleyasının, Türkdilli Ölkələrin Parlament Assambleyasının (Türk PA), Qaradəniz İqtisadi Əməkdaşlıq Təşkilatının Parlament Assambleyasının (QDİƏT PA), Müstəqil Dövlətlər Birliyinin Parlament Assambleyasının (MDB PA), Avropa Parlamenti, GUAM (Gürcüstan-Ukrayna-Azərbaycan-Moldova) Parlament Assambleyasının nümayəndələri də iştirak ediblər.

- Bu gün Azərbaycan parlamentinin 100 illiyi təmtəraqlı şəkildə qeyd olundu. Bu gün keçirilən tədbirlə bağlı hansı məlumatları verə bilərsiniz?

- Çox önəmli və möhtəşəm bir tədbir keçirildi. Tədbirə 50-dən çox dövlətin rəsmi nümayəndələri, müxtəlif dövlətlərin səfirləri, müxtəlif beynəlxalq təşkilatların rəsmiləri iştirak edirdilər. Tədbirdə Azərbaycan Respublikası Prezidenti İlham Əliyevdə iştirak etdi. Azərbaycan Xalq Cümhuriyyətinin yaradılmasını tarixi hadisə adlandıran dövlətimizin başçısı xalqımızın Şərqdə ilk demokratik respublikanın yaradılması ilə fəxr etdiyini bildirdi.  

“Bugünkü inkişafımızda Azərbaycan parlamentinin də payı var”, - deyən Prezident İlham Əliyev Milli Məclisin müstəqilliyimizi möhkəmləndirdiyini, ölkəmizin inkişafına öz töhfəsini verdiyini vurğuladı. Burada qəbul olunan qanunların həyatımızın bütün sahələrini əhatə etdiyini və bizim qanunvericilik bazamızın ən yüksək meyarlara cavab verdiyini deyən dövlətimizin başçısı qeyd etdi ki, parlament çoxpartiyalı sistemin təkmilləşdirilməsində önəmli rol oynayıb və milli maraqlar məsələsində deputatlarımız bir nöqtəyə vurur, vətənpərvərlik göstərərək dövlətin maraqlarını beynəlxalq səviyyədə müdafiə edirlər.  

Ermənistan-Azərbaycan Dağlıq Qarabağ münaqişəsindən danışarkən dövlətimizin başçısı qeyd etdi ki, işğal olunmuş torpaqlarda bütün infrastruktur dağıdılıb, milli sərvətimiz talan olunub, xalqımıza qarşı hərbi cinayət - Xocalı soyqırımı törədilib. Ermənistan münaqişənin həlli ilə bağlı beynəlxalq təşkilatlar tərəfindən qəbul olunan qətnamələrə məhəl qoymur, işğalçılıq siyasətini davam etdirir.   

Bu gün Azərbaycanın iştirakı olmadan bölgədə heç bir layihənin reallaşdırılmasının mümkün olmadığını, getdikcə ölkəmizin bütün sahələrdə gücünün artdığını, Azərbaycanın beynəlxalq səviyyədə, qonşu ölkələrlə uğurlu əlaqələr qurduğunu deyən prezident qeyd etdi ki, son 15 ildə iqtisadiyyatımız 3,2 dəfə artıb. Bu gün Azərbaycanın dünya xəritəsində bir uğur nümunəsi olduğunu, ölkəmizin tam müstəqil siyasət yürütdüyünü deyən dövlətimizin başçısı Azərbaycanın öz milli maraqlarını tam təmin etdiyini və Azərbaycan parlamentinin bu işdə mühüm rolunun olduğunu diqqətə çatdırdı.

- Türkiyə Böyük Millət Məclisinin sədri Binəli Yıldırım bu günki tədbirdə maraqlı açıqlamalar verib. Bu açıqlamaya münasibət bildirə bilərsiniz?

- Əlbəttə, Binəli bəy Türkiyə rəhbərliyi adından bu tədbirdə iştirak edirdi. O qeyd etdi ki, “Biz ümumiyyətlə Azərbaycanı əcnəbi ölkə hesab etmirik”. Bu açıqlaması iki qardaş ölkənin bir-birinə olan xoş münasibətinin əyani sübutu idi. Həmçinin o, Dağlıq Qarabağ məsələsində Azərbaycanın ərazi bütövlüyünü tam şəkildə dəstəklədiklərini bildirib. Ümumiyyətlə bugünki tədbirdə yalnız qardaş Türkiyə Respublikasının rəsmiləri deyil, bir çox əməkdaşlıq etdiyimiz dövlətlərin nümayəndələri bu məsələdə Azərbaycan mövqeyindən açıqlamalar verdilər.

- Günün əsas mesajı nə idi, sizcə?

- Günün əsas mesajını bütün dünyaya Azərbaycan Prezidenti İlham Əliyev verdi. O, Azərbaycan parlamentinin yalnız Azərbaycan üçün deyil, bütün müsəlman şərqi üçün bir ilk olmasını diqqətə çatdırmaqla Azərbaycanın qədimdən gələn demokratik ənənələrini diqqət mərkəzinə çəkdi. Bu Azərbaycana demokratiya dərsi keçməyə çalışan bəzi dövlətlərə çox önəmli mesaj idi.

- Azərbaycan parlamentinin dünəni və bu gününü necə dəyərləndirirsiniz?

- Azərbaycan parlamenti müsəlman şərqində ilk parlamentdir. Bu parlament nəinki müsəlman, dünya dövlətləri arasında qadınlara seçki hüququ verən ilk ali orqanlardan biridir. Azərbaycan parlamenti Azərbaycan xalqının demokratiya tarixini əks etdirir. Parlamentin bu gününə gəldikdə isə Azərbaycan Prezidenti İlham Əliyevin də qeyd etdiyi kimi bu gün Azərbaycanın daxili və xarici siyasətində Milli Məclisin əvəzsiz yeri var. Milli Məclis Azərbaycan xalqının hüquq və azadlıqlarının əsas təminatçısıdır.

Müsahibəni götürdü: Nicat İsmayılov