Polşanın müdafiə naziri bildirib ki, ölkə Rusiyayönlü qonşusunun “sabitliyi pozan” hərəkətləri fonunda çəkindirici vasitə kimi Belarusla sərhədini qoruyan qoşunlarının sayını artırıb.
Mariuş Blaşçak Polşanın şərqindəki Yarlovkada bu yaxınlarda Belarus sərhədinə yaxın yerdə yerləşdirilən bəzi qoşunlarla görüşüb. Onun sözlərinə görə, Varşava ABŞ Konqresinin qərarını gözləyir. Qanunverici orqan gələn həftə Polşanın Abrams tankları və helikopterləri ilə bağlı müraciətini təsdiqləməlidir.
Blaşak iddia edir ki, bu tanklar və helikopterlər Belarusla keçilməz sədd təşkil edəcək. Polşanın Rusiyanın müttəfiqi Belarusla gərginliyi artır. Ukraynadan sonra Polşada yeni cəbhə açıla bilərmi?
Polşalı siyasi ekspert, Dunay Regionu və Mərkəzi Avropa İnstitutunun tədqiqatçısı Malvina Talik Ednews-a bildirib ki, hazırda Polşada yeni cəbhənin açılması qeyri-real olaraq qalır:
“Polşa-Belarus sərhədində gərginlik illərdir, xüsusən 2021-ci ildən Belarusun sərhəd bölgəsində sabitliyi pozmaq məqsədilə qaçqın və miqrantlardan istifadə etməyə başladığı, sanksiyalara cavab olaraq Aİ-yə təzyiq göstərdiyi vaxtdan bəri artmaqdadır (Bununla bağlı daha geniş məlumatı burada qeyd etmişəm: https://www.fairobserver.com/region/europe/malwina-talik-idm-migrant-crisis-poland-belarus-border-alexander-lukashenko-eu-news-12516/)”.
Onun sözlərinə görə, son vaxtlar sərhəddə insidentlərin və təxribatların artması müşahidə olunur, məsələn, Belarus ordusunun Vaqner Qrupunun muzdlularının iştirak etdiyi hərbi təlimləri ilə yanaşı, iki Belarus hərbi helikopterinin Polşanın hava məkanını pozmasını da qeyd etmək olar:
“Polşa hakimiyyət buna orqanları Rusiyanın qarşısını almaq və yerli əhalini sakitləşdirmək məqsədi ilə sərhədi gücləndirməklə cavab verir. Oktyabrda Polşada keçiriləcək parlament seçkiləri ərəfəsində belə hadisələrin artacağına dair geniş məlumat var. Rusiyanın dezinformasiya səyləri ilə birlikdə onlar həqiqi hərbi təhlükədən daha çox psixoloji oyunun bir hissəsidir.
“Polşa özünü təhlükəsiz hiss edir və digər NATO üzvləri tərəfindən dəstəklənir. Sərhədi keçmək Polşada qəbul edildiyi kimi, Kreml üçün həm hərfi, həm də məcazi mənada çox təhlükəli addım olardı”, - deyə siyasi ekspert yekunda vurğulayıb.
Ülviyyə Şahin