ABŞ və Böyük Britaniya kibercinayətkarlıq ittihamı ilə 11 rusiyalıya sanksiya tətbiq edib.
Birləşmiş Ştatlar Dövlət Departamentinin sözçüsü Metyu Miller mətbuata açıqlamasında bildirib ki, ABŞ Böyük Britaniya ilə koordinasiyada ABŞ hökumətinə, müxtəlif şirkətlərə və xəstəxanalara hücum edən Rusiyanın kibercinayətkarlıq şəbəkəsi “Trickbot” qrupuna qarşı tədbir görür.
"Xəzinədarlıq Departamenti şəbəkənin əməliyyatında 11 əsas iştirakçıya sanksiya tətbiq edib. Eyni zamanda, ABŞ Ədliyyə Departamenti bu gün təyin olunan yeddi nəfər də daxil olmaqla, Trickbot zərərli proqram və digər fidyə proqramları sxemləri ilə bağlı doqquz şəxsə qarşı ittiham aktını icra edib" – deyə bildirilib.
Bu ilin əvvəlində Britaniya Xarici İşlər Nazirliyi iki ölkənin yeddi rusiyalı “kibercinayətkar”a sanksiya tətbiq etdiyini açıqlayıb.
İndiyə kimi tətbiq olunan çox sayda sanksiyalara baxmaraq Rusiya öz rolunu oynamaqda davam edir və Rusiya hələ də ayaqdadır. Sanksiyaların heç biri Rusiyaya öz təsirini göstərməyib. Görünür Rusiya müharibəyə tam hazırlıqlı olub. Bu cür sanksiyalar beş ildən sonra Rusiyaya necə təsir edəcək?
Tarixçi və siyasi analitik, Britaniya, Türkiyə və Cənubi Qafqaz üzrə kitabların müəllifi Dr. Patrik Uolş Ednews-a açıqlamasında bildirib ki, sanksiyalar Rusiyaya Qərb liderlərinin gözlədiyindən qat-qat az təsir göstərib:
“Əslində, Ukraynaya maliyyə və hərbi dəstək verməkdən başqa Qərbin əsas strategiyası tarixin ən sərt sanksiya rejimi vasitəsilə rəsmi Moskvada rejim dəyişikliyinə təhrik etmək olub”.
Onun sözlərinə görə, Qərbin sanksiyaları bir sıra səbəblərə görə səmərəsiz olub:
“Birincisi, Rusiya böyük daxili sənaye bazası ilə kifayət qədər özünü təmin edən bir iqtisadiyyatdır. Onun etibarlı enerji təchizatı var. O, 2014-cü ildən bu cür kampaniyaya hazırlaşır. Həmçinin dünyanın əksər hissəsi ABŞ hegemonluğuna qarşı çıxdığı üçün sanksiyalar rejimini işlətmək istəmir. Təkcə Afrika, Asiya və Cənubi Amerika deyil, Səudiyyə Ərəbistanı və Türkiyə kimi Qərb müttəfiqləri, NATO üzvləri və Macarıstan da Rusiyaya qarşı sanksiyalara qoşulmayıb”.
Tarixçi onu da əlavə edib ki, Rusiya nefti və qazı hələ də müxtəlif üçüncü tərəflər vasitəsilə Avropaya idxal olunur, çünki alternativ Qərb iqtisadiyyatlarının dağılması və hökumətlərin süqutu ola bilər:
“ABŞ öz iradəsini tətbiq edə bilmədi və bu, digər ölkələrə aydın oldu ki, indi BRİCKS və Avrasiya inkişafı ilə çoxqütblü dünya açılır. Kiyevin baha başa gələn əks-hücumunun uğursuzluğu ilə Ukrayna münaqişəsində dönüş nöqtəsindəyik. İki böyük sual var: Qərbin B planı varmı? Bəs, Rusiya Dneiperə doğru hücuma keçəcəkmi? Sanksiyalar bu suallarla müqayisədə demək olar ki, əhəmiyyətsiz görünür”.
Ülviyyə Şahin