Paşinyanın partiyasının nümayəndəsi Armen Xaçaturyan jurnalistlərə bildirib ki, rəsmi Bakı İrəvanın təklif etdiyi üç bəndlə razılaşıb. "Sülh müqaviləsinin imzalanması “gün və ay” məsələsidir"- deyə o bildirib.
Azərbaycan-Ermənistan sülh müqaviləsi Qafqazda sülhü bərpa edə biləcəkmi? Sülhün bərpası üçün prinsiplər realdırmı?
Məsələ ilə bağlı politoloq Zərdüşt Əlizadə Ednews-a açıqlamasında bildirib ki, Azərbaycanla Ermənistan arasında bağlanan sülh müqaviləsi Ermənistan üçün böyük əhəmiyyət kəsb edir:
"Qafqaz regionu üzrə sülhün bərpası üçün gözlənilən zəmin artıq hazırdır. Ermənistanın köhnə müttəfiqi olan Rusiyanın Ukrayna və İsrail-Fələstin münaqişəsi səbəbilə Qərb ölkələrinə başı qarışması regionda bəzi geosiyasi dəyişikliklərə səbəb olacaq. Eyni zamanda Azərbaycan yaranan şəraitdən məharətlə istifadə edərək öz ərazi bütövlüyünü bərpa etdi. Belə olduğu halda Erməmistan hakimiyyəti düşdüyü vəziyyəti düzgün qiymətləndirirək belə nəticəyə gəlir ki, beynəlxalq hüquq meyarları əsasında qonşusu Azərbaycan və Türkiyə ilə münasibətlərini tənzimləyə bilər. Həmçinin belə etdiyi təqdirdə Ermənistan xalqı və iqtisadiyyatı üçün çox münasib şərait yaranacaq. Ermənistan üçün bu inkişafın sferalarıda fərqli olacaq. Həm təhlükəsizlik baxımından, həm regional blokadadan azad olunması təqdirdə iqtisadiyyatın inkişafı baxımından, həm də əhalinin rifah səviyyəsi baxımından yüksək qalxınma prosesi baş tuta bilər".
Politoloq qeyd etdi ki, bağlanacaq müqavilənin sahələri də geniş olacaq:
"Tərəflər, o cümlədən ərazi bütövlüyü, beynəlxalq sərhədlərinin toxunulmazlığı və ərazi iddialarının qaldırılmayacağını təsdiqləməlidirlər. Həmçinin, dövlətlərarası münasibətlərdə hədə və gücdən istifadə etməmək prinsipi qeyd olunur.
Daha bir prinsip kommunikasiyaların açılması və sərhədlərin delimitasiyası və demarkasiyasına aiddir".
Xəyal Ramiz