Qərb Ukraynaya köməyi limit qoyub. Ekspertlərin fikrincə, göndərilən hərbi və finans yardımların Rusiyanın əldə etdiyi ərazilərdə möhkəmlənməsi ilə nəticələnə bilər. Prezident Zelenski isə hakimiyyətinin ölkə daxilində sual altında olduğu bir zamanda, köməyin davam etdirilməsini təmin etmək üçün sabah Vaşinqtona rəsmi səfər edəcək.
Səfərin məqsədinə çatmaması Ukraynanı hansı addımları atmağa vadar edəcək?
Mövzu ilə bağlı Ednews-a danışan Ukraynalı deputat Aleksandr Merejko bildirib ki, ABŞ hərbi dəstəyi dayandırsa da,
Avropa Ukraynaya kömək edəcək.
“Bizim üçün Rusiyadan fərqli olaraq əsgərlərimizin canı önəmlidir və bunun üçün strateji geriləmələrin vacib olduğunu düşünürəm. Doğrudur ki, Ağ Ev son vaxtlarda zəif xarakterli siyasət yürüdür. Lakin, elə buna görə də diplomatik görüşlər keçirilir və yeni razılaşmalar əldə olunur. Hazırda Ukraynanın vəziyyəti həmişəkindən daha ağırdır, bunu inkar etmək qeyri-mümkündür. Bununla belə, Rusiyanın qalib olması Avropanın təhlükəsizliyinə ziddir. Bu səbəbdən məsələyə sadəcə ABŞ-ın deyil, həm də Avropanın perspektivindən baxmaq lazımdır. Avropa dövlətləri, əsas da Almaniya Ukraynanın müdafiəsi üçün əlindən gələni etməyə hazırdır. Rusiyanın qələbəsi ilk növbədə Almaniya, sonra da bütün Avropa ölkələrinin qəbul edə biləcəyi bir güzəşt deyil. Prezident Bayden ilə keçiriləcək görüş təbii ki, öz nəticəsini verəcək, gec və ya tez. ABŞ senatının məsələnin ciddiyyətini anlaması həm bizim, həm də ABŞ diplomatlarının üzərinə düşən vəzifədir.
Hər bir halda Ukrayna tərəfi özünü dövlət ərazilərindən vaz keçib sülh müqaviləsi bağlaya bilməz. Hərbi yardımlar geciksə də, ukraynalıların davamlı şücaəti nəticəsində müharibəni öz sərhədlərimizdə bitirəcəyik”,- deyə ekspert fikrini tamamlayıb.
Zelenski hakimiyyətdən gedir?..
Bütün bu hadisələr baş verərəkən bir yandan da Ukraynanın daxili siyasətində balansın pozulması müşaidə edilir. Bir çoxları artıq Zelenskinin xidmətə yararlı olmadığını düşünür. Onun seçkilərə qarşı çıxması siyasi etibarının zəifləməsinə təkan verib. Bu müharibəyə necə təsir edir?
Bununla bağlı ukraynalı siyasi ekspert Vadim Tryuxan dünya mediasının məsələni abartdığını və hökümətdə sabitliyin bərqərar olduğunu bildirib.
“Ölkənin təhlükəsizliyinin tam şəkildə bərqərar olmadığı bir halda prezident seçkiləri keçirmək məsuliyyətsizlik olardı. Elə buna görə də, Ukrayna Ali Radasında ən son qəbul edilən qərara əsasən, hərbi vəziyyətin sonuna qədər prezident seçkilərin keçirilməyəcək.
Zelenskinin etibarı sarsılırsa, bu o deməkdir ki, ölkədə xainlər var. Müharibə vaxtı hakimiyyət uğrunda heç bir rəqabət aparılmamalıdır. Hazırki vəziyyətdə biz bu hakimiyyət uğrunda rəqabətin müharibəyə təsir etməməsi üçün əlimizdən gələni edirik. Lakin, bizi dünya mediasında müharibənin gedişatı haqqında yayılan yalanlar daha çox narahat edir. Dünya medisına nəzər salsaq müharibə artıq bitib və Rusiya qalibdir. Doğrudur, Putin elə siyasi manevrlər edir ki, insanlar onun tamamilə üstünlük vəziyyətində olduğunu düşünürlər. Ukrayna höküməti özünün stabilliyini qorumağı bacarır və bu məsələlərin müharibəyə təsir etmədiyini düşünürəm”.
Fərid Axund