Zərdüşt Əlizadə: “Yəmən və Husilər Qərbə məğlub olmayacaq” Yəməndəki Husilərin obyektlərinə ABŞ və Britaniya tərəfindən raket hücumları olub.
Britaniya və ABŞ-ın Yəmənə qarşı tətbiq etdiyi raket hücumları hansı məqsədlərə xidmət edir? Əsas səbəblər və hədəflər nədir?
Bu son hücumların bölgədəki müstəqillik və təhlükəsizlik siyasətinə təsiri olacaqmı?
Yəmən üzrə keçmiş iqtisad müşaviri, politoloq Zərdüşt Əlizadə bildirib ki, ABŞ və Böyük Britaniya BMT-nin təhlükəsizlik qaydalarına məhəl qoymadan, saxta ittihamlarla Yaxın Şərqlə bağlı demək olar ki, bütün proseslərdə birgə hərəkət ediblər.
“Husilərin İsrailə qarşı hücumların böyük hissəsi ABŞ gəmiləri və puaları ilə dəf edilir. Ümumiyyətlə Yəməndə baş verən proseslərin əsas odur ki, Qərb qüvvələri Yəmən xalqının əzmini tam əzə biləcəyini düşünür. Yəmən Ərəb Baharından sonra tamamilə müharibə zonasına çevrilib.
Qısaca desək keçən əsrdən bəri məzhəb, vətəndaş müharibələri, xarici qüvvələrin müdaxiləsi, ingilis ağalığı, üsyanlar və s. kimi məsələlərlə Yəmən həmişə qaynar nöqtə olub. Eyni zamanda hansısa bir viran qalmış ölkədə bir qədər insanın ölməsi və ya hər hansı bombardmanın olması ölkəyə təsir etməyəcək. Həmçinin Qərb ölkələri Əfqanıstanda necə uğur qazana bilmədilərsə, burda da eynisi baş verəcək”.
Politoloq vurğulayıb ki, Yəmənin daxilində də vəziyyət son dərəcə gərgindir:
“Səudiyyət Ərəbistan tərəfindən husilərə qarşı koalisiya yaradılıb və 7 ölkə ora cəlb edilib.
Koalisiya Yəmən mərkəzi hökümətini dəstəkləyir. Qarşı tərəf isə şiə məzhəbli husilərdir. 2004-ci ildən ölkədə baş verən vətəndaş müharibəsi vəziyyəti olduqca gərginləşdirib.
Müharibə başlayandan bəri mən düşünürdüm ki, Səudiyyə Ərəbistan orada məğlub olacaq və elə də oldu. Husilər onları Ədən körfəsinə sığışdırıb.
Hazırda da ölkənin 80 faizi husilərin nəzarətindədir. Tarixi faktlara nəzərə salsaq görərik ki, şiə məzhəbli tayfalar 10 əsrə yaxındır ki, bu torpaqlarda yaşayırlar. Qədim dövrlərdən bu yana Yəməndə saysız-hesabsız münaqişələr baş verib. Yəni Qərbin planları Yəmən üzərində təsir göstərməyəcək”.
Xəyal Ramiz
