Fevralın 17-də ABŞ konqresini əlavə yardım haqqında qanun layihəsini qəbul etməməsi səbəbindən hərbi sursat yardımından məhrum qalan Ukrayna ordusu, şərqdəki Avdievka şəhərindən geri çəkilmək məcburiyyətində qaldı. Bu, demək olar ki, Rusiyaya bir il aradan sonra növbəti hərbi qələbəsini qazandırdı. Bu göstərir ki, Ukraynadakı gedişat ABŞ – dan olduqca aslıdır.
Trampın NATO-dan çıxmaqla bağlı son bəyanatlarını nəzərə alsaq, Avropa qitəsi, ABŞ olmadan özünü müdafiə edə bilərmi?
Finlandiyalı hərbi ekspert Emil Kasteyelmi, Ednews – a açıqlamasında bu ssenariyə bir çox perspektivdən baxmağın vacibliyini vurğulayıb.
“Rusiya hazırda NATO-ya ciddi bir zərər yetirə bilməz, çünki onların qüvvələrinin əksəriyyəti Ukraynada sıxışıb və itkilər çox olub. Rusiya Ukraynanın Avdievka şəhərini tuta bilsə də, bu son bir ildə onların ümumi hücum taktikalarının sürətli və ya çox uğurlu olduğunu demək deyil. ABŞ-a gəldikdə isə deyə bilərəm ki, o, NATO-dan qətiyyən imtina etməyib və hətta Tramp prezident olsa belə, böhran dövründə ABŞ-ın bunu edib - etməyəcəyi bəlli deyil. Bununla belə, onlara çox arxalanmamaq lazımdır. Bu da bir həqiqətdir ki, Avropa ölkələri öz müdafiə imkanları üçün daha çox məsuliyyət daşımalıdırlar”.
Hərbi ekspert hesab edir ki, Avropa hələ də özünü Rusiyadan müdafiə etmək iqtidarındadır:
“Təbii olaraq alyansdakı ən güclü dövlət olmasa, vəziyyət daha çətin olacaq. Lakin NATO-nun şərq sərhədi hərbi cəhətdən bacarıqlı ölkələrdən ibarətdir. Məsələn, Finlandiya və Polşa buna ən gözəl nümunədir. Baltikyanı ölkələr və İsveç də öz imkanlarını davamlı olaraq inkişaf etdirir və Avropanın hərbi sənayesi uzun bir müddətdən sonra bu qədər fəaldır. ABŞ-ın kömək etməyəcəyi və Rusiyanın genişmiqyaslı hücuma keçəcəyi ssenarini təsəvvür etsək, Avropa əvvəlcə çətinlik çəkə bilər, amma sonda NATO ölkələrində daha çox insan gücü, daha böyük iqtisadiyyat və daha çox istehsal imkanlarının olması bu gedişatı dəyişəcəkdir. Hərçənd burada – arqumentdə ən güclü fakt odur ki, biz hələ Ukrayna müharibəsi ərəfəsində Avropada “müharibə iqtisadiyyatı”nı görməmişik”.
Əkbər Novruz