Prezident İlham Əliyev Almaniya İqtisadiyyatının Şərq Komitəsinin sədri Mixael Harms ilə görüşdə Azərbaycanın Avropa Şurasından çıxması məsələsinə baxacağını bildirib. Onun sözlərinə görə, Azərbaycan sülh prosesinə sadiqdir.
“Məhz İkinci Qarabağ müharibəsi başa çatdıqdan sonra biz sülh danışıqları təşəbbüsü ilə çıxış etdik. Faktiki olaraq, biz sülh nizamlanması üçün 5 əsas prinsip hazırlamışıq və sülh müqaviləsinin mətninin layihəsini təqdim etmişik. Əgər sülh istəmiriksə, bütün bunları niyə etməliyik?!”
Ölkə prezidenti həmçinin, Avropa ölkələri bu cür mövqe bildirməyə davam edəcəkləri təqdirdə AŞPA kimi, AŞ-dan da çıxmağı düşünə bilərik söyləyib.
Bu gedişlər Azərbaycan Avropa siyasi məkanını tərk edərək, şərqə- alternativlərə üz tutacaq yoxsa bu sadəcə Kollektiv Qərbə xəbərdarlıqdır?
Cənubi Qafqaz Tədqiqatlar Mərkəzinin direktoru Fərhad Məmmədov Ednews-a açıqlamasında bidirib ki, ölkə prezidentinin bu qərarını korrektləşdirmək niyyətindədir.
“Azərbaycanın prinsipial mövqeyi ondan ibarətdir ki, ərazi bütövlüyünü şübhə altına alan hər hansısa dövlət və ya qurumla münasibətə yenidən baxıla bilər. Azərbaycan perzidenti də Avropa nümayəndələri ilə görüşlərdə bu məsələni qaldırır. AŞPA-nın məlum sərgilədiyi mövqe və ümumiyyətlə Avropa Şurasının instutları ilə bağlı münasibətlərdə, Azərbaycan bir daha bildirir ki, Azərbaycanın ərazi bütövlüyünü sual altına alan ölkə və ya qurumla münasibətlərin kəsilməsi mümkündür. Nəzərə almaq lazımdır ki, münasibətlərin pisləşmisində təşəbbüskar Azərbaycan deyildi. Azərbaycan sadəcə cavab verir. Ona görə həmin qurumların və qurumlarda söz sahibi olan ölkələrin mövqelərini korrektləşdirmək niyətilə, ölkə prezidenti bu cür bəyanatlar verir ki, sabah hər hansısa bir qərar qəbul olunduqda, bu həmin ölkələr üçün surpriz qərar olmasın. Eyni zamanda onlara vaxt da tanınır ki, Azərbaycana qarşı ədalətsiz mövqedə dəyişiklik edilsin”.
Politoloq İlyas Hüseynov bu çıxışları Qərbə qarşı bir xəbərdarlıq olaraq qeyd edib:
"Cənab prezident İlham Əliyev Almaniya iqtisadiyyatının şərq komitəsinin sədri ilə görüşdə Azərbaycanın AŞPA-dan çıxacağı ilə bağlı fikirlərini bölüşdü. Əlbəttə ki, bu reallığı əks etdirir. Çünki Azərbaycan Avropa Şurası Parlamenti Assambleyası ilə əməkdaşlığını qeyri-müəyyən müddətə dayandırıb və bu həm də onu göstərir ki, AŞPA Azərbaycana qarşı qeyri-obyektiv mövqedən çıxış edirdi. Bunu vətən müharibəsindən sonra da davamlı şəkildə görürdük. Digər tərəfdən qeyd etmək lazımdır ki, 30 illik işğal dövründə də biz Ermənistana eyni münasibəti sərgiləndiyini gördük. Sanki işğalçı himayə olunurdu, status-kvo dəyişməz olaraq qalırdı. Məhz bu səbəbdən Azərbaycan prezidenti bildirir ki, bu qərəzli münasibət aradan qaldırılmalı, Azərbaycan dəymiş ziyan ödənilməli, cinayətlərə görə həmin şəxslər cinayət məsuliyyətinə cəlb olunmalıdır. Lakin biz tamamilə əks münasibəti görürürük. Ona görə də bizə qarşı laqeyd münasibət olan yerdə fəaliyyətimizi daha da genişləndirə bilmərik. Xüsusi ilə ölkəmizə qarşı qərəzli fikirlər, yanaşmalar sərgilənirsə bu əməkdaşlığın faydası görünmür. Düşünürəm ki, bu mesaj xarakterli, çağırış əsaslıdır. Əgər bizim fikirlərimizə heç bir reaksiya gəlməsə və Avropa Şurası özünün atdığı addımlardan bir nəticə çıxartmasa, Azərbaycan prezidenti də növbəti atacağımız addımlarla bağlı xəbərdarlıq etmişdir".
Əkbər Novruz
