“Yeniyetmələrin intihar probleminin kökündə, təhsil, düzgün aparılmayan təhsil islahatları dayanır. Yəni, bu orta məktəbdə “verilən dərslərlə” imtahanın suallarını cavablamaq olmur. Valideyn repetitor tutmağa məcbur olur. Müəllimlər orta məktəblərdə dərs keçmək istəmirlər ki, şagirdlər repetitor olaraq onların yanına getməli olsun”.
Bu sözləri Ednews-a açıqlamasında psixoloq Gülnar Orucova deyib.
O, daha sonra ötən gün baş tutan intihar hadisəsi ilə bağlı fikirlərini bildirib:
“Ümumiyyətlə, hazırda heç bir imtahanın nəticəsi çıxmayıb. Yeniyetmə tərəfindən təxminlər ola bilər. Belə təxminlər daha çox buraxlış vərəqlərini yoxlayan müəllimlərin çıxardığı nəticələrə görə, bir də valideynin tənqidinə görə ola bilir. Sadalananların mütləq doğru olduğunu deyə bilmərik, çünki bu mövzuda övladını itirmiş ailəyə də çox yüklənmək doğru deyil, lakin çox zaman bu ehtimallar intiharların səbəbi olur. Belə halların yaranmasına əslində valideyn yox, düzgün aparılmayan təhsil sistemi səbəb olur. Bu səbəbdən də, vəziyyətə nəzarət olunmalıdır. Suallar keçən il çox çətin salınmışdı və həmin vaxt niyə bir nəfər 300 bal toplamadı, bu il 53 nəfər 300 bal toplayıb? Danışdığımız məsələ digər tərəfdən Mələykə Abbaszadənin düzgün aparılmayan təhsil proqramı, təhsil islahatından qaynaqlanır. Bu problemlərdən dolayı uşaqlar,yeniyetmələr intihar edir”.
Gülnar Orucova bildirir ki, universitetlərə qəbul məsələsində humanizm prinsipindən çıxış etmək lazımdır. Qəbulun asanlaşdırılması şagirdlərin bu mövzuda həyəcan və aqressiyasını azalda bilər.
“Valideyn repetitorlara pul xərcləyir, bu səbəbdən də uşağının üzərinə məsuliyyət qoyur, hətta bəzən uşağına aqressiya ilə yanaşır. Ona görə də bu məsələdə tək valideyni günahlandırmaq olmaz. Bu həm də zərərçəkmiş ailəyə iknci zərbəni vurmaq deməkdir. Yeniyetmələrin bəziləri valideynlərə məktub yazıb qoyurlar. Məktublarda da valideynin tənqidi, valideyn iradı, valideyn aqressiyasını biz hiss edə bilirik. O baxımdan deyirəm ki, valideynlər repetitorlara pul tökməsələr, bugün intihar hadisəsi olmaz”, - psixoloq vurğulayıb.
Xəyal Ramiz
