Kanadada genişmiqyaslı meşə yanğınları səbəbilə üç əyalətdə 25 mindən çox sakin evakuasiya edilib. EDnews "The Independent"ə istinadən xəbər verir ki, davam edən yanğınlar ABŞ-ın bir sıra ştatlarında da hava keyfiyyətini təhlükə altına salıb.
Ən çox təxliyə edilənlər Manitobadan olub. Burada ötən həftə fövqəladə vəziyyət elan edildikdən sonra minlərlə insan evlərini tərk etmək məcburiyyətində qalıb. Albertada 1300 nəfərlə birlikdə 17 minə yaxın insan köçürülüb, Saskaçevanda isə 8000-dən çox sakin təhlükəsizlik tədbiri olaraq ərazidən çıxarılıb.
Mütəxəssislər bildirir ki, tüstü səbəbindən həm Kanada, həm də ABŞ-ın sərhəd bölgələrində havanın keyfiyyəti kəskin şəkildə pisləşib, görmə məsafəsi azalıb. Saskaçevan İctimai Təhlükəsizlik Agentliyi əhaliyə xəbərdarlıq edib ki, tüstü səbəbilə havanın keyfiyyəti saatdan-saata dəyişə bilər və sağlamlıq üçün ciddi risklər yarana bilər.
Saskaçevanın Baş naziri Skott Moe qeyd edib ki, davam edən isti və quru hava yanğınların böyüməsinə səbəb olur:
“Növbəti dörd-səkkiz gün bizim üçün kritik olacaq. Yalnız ciddi yağış yağarsa, vəziyyət sabitləşə bilər”, – deyə o bildirib.
Manitobanın şimal-qərbində yerləşən Flin Flon şəhərində 5000-dən çox insan evakuasiya edilib. Bu bölgədəki yanğınların səbəbi Saskaçevan əyalətinin Creighton yaxınlığında başlayan və sonradan sürətlə yayılan alovlardır. Elektrik enerjisinin kəsilməsi və tüstü səbəbilə bölgədə həyat iflic vəziyyətinə düşüb.
ABŞ Kənd Təsərrüfatı Nazirliyinin Meşə Xidməti Albertaya hava tankeri yerləşdirib və Kanadaya 150 yanğınsöndürən və əlavə avadanlıq göndərəcəyini açıqlayıb.
ABŞ Ətraf Mühitin Mühafizəsi Agentliyinin AirNow portalının məlumatına əsasən, Şimali Dakota, Montana, Minnesota və Cənubi Dakota ştatlarında havanın keyfiyyəti “qeyri-sağlam” səviyyəyə düşüb.
Yanğınların nə vaxt tam nəzarət altına alınacağı hələlik bilinmir. Rəsmilər isə ümid edirlər ki, yaxın günlərdə baş verəcək yağışlar vəziyyəti yüngülləşdirəcək
Fatimə Şükürova // EDnews
