Ermənistanın Təhlükəsizlik Şurasının katibi Armen Qriqoryan bu gün mayın 23-də Yerevanda jurnalistlər qarşısında Azərbaycanın Müdafiə naziri Zakir Həsənova atəş açıldığı haqda iddia irəli sürüb.

Eurasia Diary Virtualaz.org-a istinadən xəbər verir ki, jurnalistlər Qriqoryandan Azərbaycan ordusunun mayın 20-də başlamış təlimlərinin ikinci günü Ermənistana göndərilmiş “Növbəti dayanacağımız Şuşadır, bizi gözləyin...” mesajı barədə soruşublar.

Qriqoryan isə deyib ki, belə mesajlara baxmayaraq Azərbaycanın Müdafiə naziri bu günlərdə təmas xəttində olarkən Ermənistan silahlı qüvvələrinin “müşahidəsi altına düşüb” və tələsik təmas  xəttini tərk edib.

Virtualaz.org bu bəyanatla bağlı Azərbaycan Müdafiə Nazirliyi ilə əlaqə saxlayıb. Nazirliyin mətbuat xidmətindən aşağıdakı açıqlamanı veriblər: “Ermənistan Təhlükəsizlik Şurasının katibi Armen Qriqoryanın sərsəm və axmaq açıqlaması gülüş doğurur və onun hərbi işlərdə necə diletant olduğunu göstərir. Azərbaycanın həm işğal altında olan əraziləri, həm Ermənistanın bütün ərazisi tamamilə və bütünlükdə Azərbaycan ordusunun bölmələrinin müşahidəsi altındadır”.

Xatırladaq ki, Müdafiə naziri, general-polkovnik Zakir Həsənov ötən gün təlimlər çərçivəsində təmas xəttindəki mövqelərə baş çəkib. Hərbçilərə göstəriş verib ki, düşmənin istənilən təxribatının qarşısını bütün növ silahlardan istifadə olunmaqla dərhal və qətiyyətlə alsınlar.

Qeyd edək ki, General Polkovnik Zakir Həsənova qarşı heç bir təxribat həyata keçirilməyibsə belə, ötən günlərdə onun düşmən təxribatlarının dərhal qarşısının alınması və düşmənə laiqli cavabın verilməsi barədə əmr verməsi cəphədə hər an vəziyyətin gərginləşə biləcəyinə işarə edir.