Türkiyənin son vaxtlar S-400 və digər müasir silahlar əldə etməsi bütün dünyada olduğu kimi Azərbaycanda da maraqlı izlənməkdədir. Bəzi siyasilər hesab edir ki, öləmizin strateji müttəfiqi olan Türkiyənin müasir silahlarla təchizatı dolayısı ilə Azərbaycan üçün də faydalıdır və ölkəmiz dar məqamda bu amildən faydalana bilər.

Eurasia Diary xəbər verir ki, məsələ ilə bağlı Moderator.az-a açıqlama verən hərbi ekspert Azad İsazadə Türkiyənin hərbi imkanlarından Azərbaycanın hər şeydən öncə psixoloji baxımdan faydalana biləcəyini vurğuladı:

“Bu gün biz Rusiyanın Abxaziyada, Ermənistanda, Osetiyada təlim keçirdiyini, bununla güc nümunəsi göstərdiyini görürük. Hesab edək ki, sabah Azərbaycan və Ermənistan arasında hərbi münaqişə bərpa edilir və Türkiyə S-400-ləri Ermənistan sərhəddi yaxınlığında quraşdırır, bu raketləri döyüş hazırlığı vəziyyətinə gətirir. Bu, o deməkdir ki, Ermənistanın bütün səması praktiki olaraq həmin S-400-lər vasitəsi ilə vurula bilər. Bu da hardasa güc nümayişidir, Azərbaycana dəstəkdir. Istər-istəməz Ermənistan belə bir güc nümayişinə reaksiya verməlidir.

Türkiyədə nə qədər müasir silah osla, bu, Azərbaycan üçün bir o qədər faydalıdır. Türkiyə hətta o silahları atmasa belə, bu silahların varlığı yenə də Azərbaycan üçün psixoloji dəstək, düşmən üçün psixoloji zərbədir”