"Yeni Azərbaycan" qəzetinin keçmiş baş redaktoru, eks-deputat Alqış Musayev Azərbaycanın Ermənistan tərəfindən işğal altında olan Xankəndi şəhərində Türkiyənin konsulluğunun açılmasını təklif edib.

"Azərbaycanın strateji məntəqələrində - Naxçıvanda və Gəncədə Türkiyənin konsulluğu fəaliyyət göstərir. Xankəndində niyə olmasın? Aydındır ki, hazırda bunu praktiki baxımdan reallaşdırmaq mümkün deyil. Amma bu, heç bir hüquqa zidd deyil. Belə bir qərarın (simvolık olsa da) qəbulu və elanı böyük siyasi fayda gətirər", - deyən keçmiş deputat hesab edir ki, bu addım problemin həllinə yeni təkan verər və Ermənistana ciddi xəbərdarlıq olardı: "Eyni mövqedən bir neçə müsəlman dövlətinın çıxış etməsi daha böyük siyasi və diplomatik effekt doğura bilər. Belə bir həmrəylik alınarmı?"

Eurasia Diary A.Musayevin təklifi ilə bağlı bir sıra siyasətçilərin fikirini öyrənib.

Deputat Fazil Mustafa bildirdi ki, bu təklifin baş tutması hüquqi baxımdan mümkün deyil:

“Ümumiyyətlə, bu, ciddi təklif deyil. Yaxşı olardı ki, Türkiyə Xankəndidə hərbi bazasını yaratsın. Yaratması istiqamətində də, fəaliyyətə keçsin. Yəni, gələcəkdə bunu etmək lazımdır ki, o baza da bütövlükdə azərbaycanlıların və ümumiyyətlə dinc sakinlərin normal yaşamını təmin etsin”.

Politoloq Zəlimxan Məmmədli isə hesab edir ki, bu, axmaq bir təklifdir. “Hələlik bu status bəlli deyil. Azərbaycanın ərazisinə təcavüz olub, orada separatçı bir rejim var. Biz konsulluq müqavilələrini kimlərlə bağlıyacağıq, biz onları hüquqi tərəfdən tanıyacayıqmı, Qarabağ problemi həll olunubmu, təzminatlar ödənilibmi, qaçqınlar geri qayıdıbmı? Yaxud da, Ermənistan, Dağlıq Qarabağ separatçıları Azərbaycana təcavüz cəhdlərindən imtina ediblərmi, etiraflar olubmu? Bunlar olmamış mənə elə gəlir ki, hər hansı diplomatik münasibətlərdən, o cümlədən, konsulluq idarəsinin açılmasından danışmaq absurddur. Mənə elə gəlir ki, bu gün o cür təkliflər bizim milli maraqlarımızı təhdid edən, o cümlədən, Dağlıq Qarabağ üzərində suveren hüquqlarımızı bərpa etmək cəhdlərinin qarşısını almaq cəhdidir.”

Politoloq Elxan Şahinoğlu isə bildirdi ki, bu o deməkdir ki, Dağlıq Qarabağın azad edilməsini Türkiyəyə yükləmək istəyirik.

“Əlbəttə ideya kimi pis deyil, yaxşı ideyadır. Ancaq torpaqlarımızı özümüz azad etməliyik. Əgər Türkiyə Xankəndidə konsulluq açacaqsa, deməli ora yerləşdirilməlidir. Yerləşdirmək üçün oranı azad etməlidir. Yəni, bu məsələ bizə aid olan məsələdir. Mən də hər zaman Türkiyə ilə strateji münasibətlərin tərafdarıyam və hətta deyirəm ki, Azərbaycanda Türkiyənin hərbi bazaları yaradılsın. Ancaq yenə təkrar edirəm, Xankəndidə konsulluğun açılması piar gedişi kimi yaxşı gedişdir. Axı bunun ardı da gəlməlidir. Əgər elan edib, aça bilməyəcəksə, o bizə daha çox ziyan edəcək. Ona görə biz torpaqların azad olunması məsələsini sürətləndirməliyik ki, daha sonra bu məsələləri həll edə bilək”, -deyə E.Şahinoğlu bildirib.

 Vəfa VƏLİYEVA