Ermənistan MTX-nin keçmiş rəhbəri Artur Vanetsyanın və polisin sabiq rəisi Valeri Ospiyanın istefaları, digər sahələrin və qurumların rəhbərlərinin də işdən çıxarılması ilə davam edəcək.

 

Eurasia Diary xəbər verir ki, bu barədə Ermənistanın “Hraparak” nəşri yazıb.

 

Məlumata görə, Təbiəti Mühafizə naziri Erik Qriqoryan dar bir çərçivədə Amulsar mədəninin istifadəyə veriləcəyi təqdirdə istefa edəcəyini açıqlayıb. Artıq məlum bir faktdır ki, Paşinyan mədənin istismarına vəd verib, çünki onun sözlərinə görə, mədənin istismarını qadağan etmək üçün heç bir qanuni əsas yoxdur. Yəni yaxın vaxtlarda Erik Qriqoryanın istefası gözlənilir.

 

Bildirilir ki, tezliklə Ermənistan Fövqəladə Hallar Naziri Feliks Tsolakyan, İstintaq Komitəsinin sədri Hayk Qriqoryan da istefa edəcək. İstefaların səbəbləri yaxın zamanlarda siyasi proseslərin inkişafından asılı olaraq bilinəcək.

 

Paşinyanın müavini Mher Qriqoryan və İqtisadiyyat naziri Tiqran Xaçatryanın adları da istefa verə biləcəklər arasında hallanır.

 

Qeyd edilir ki, Paşinyanın ABŞ-a səfərindən sonra istefa ərizələrini təqdim edənlər də olacaq. O, hökumətin sosial blokunu tənzimləyən nazirlərdən, səhiyyə naziri Arsen Torosyandan, sosial məsələlər üzrə nazir Zaruhi Batoyandan da narazıdır.

 

Məlumata görə, Ermənistan parlamentində də dəyişikliklər gözlənilir. Lena Nazaryan parlamentin vitse-prezidenti vəzifəsini tərk etməklə istefa verəcək. Deputat Mikayel Zolyan parlamentdə yeni yaradılan deputat qrupuna daxil olmaqla “Mənim addımım” fraksiyasını tərk edəcək. Yaxın vaxtlarda hansı deputatların bu qrupa qoşulacağı bəlli olacaq.

 

Belə çıxır ki, Ermənistan hökuməti daxilində problemlər var, hökumət daxilindəki anlaşılmazlıqlar qəfil və yekun addımlara, yəni istefalara və işdən çıxarılmalara səbəb olacaq.

 

Prosesin necə bitəcəyini proqnozlaşdırmaq hələ mümkün deyil, amma Paşinyanın tezliklə yeni bir hökumət formalaşdırması və yeni insanlarla tamamlanması problemi ilə üzləşəcəyi danılmaz bir həqiqətdir. (ordu.az)

 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan