Tanınmış ermənişünas alim, Türkiyənin Ərciyəs universitetinin professoru Qafar Çaxmaqlının bu dəfəki açıqlamasında Ermənistanın rəsmi Tehrandan incik düşməsinin ardından sərgilənən pərtliyi şərh edib. Politoloq deyir ki, son günlərdə yaşananlarda nə İranın səmimiliyinə inanmaq lazımdır, nə də Ermənistanın qaldırdığı hay-küyün ciddiliyinə:
"Artıq Azərbaycanda uşağa da bəllidir ki, Ermənistanı iqtisadi məhvolmadan çıxaran və onu açıq və gizli şəkildə dəstəkləyən İran dövləti olub. Və bir çox illərdə bu Azərbaycana arxadan zərbə vurmaq demək olmuşdur. Və bunu İranın nədən etdiyini də bilmək çətin deyil. İran Azərbaycanın güclənməsini istəmir və burada onlardan bəhs etmək fikrimiz yoxdur. Dağlıq Qarabağ məsələsində İran bəzi hallarda tərəfsiz bəyanatlar versə də həmişə erməni işğalının bir an öncə bitirilməsi üçün bir müsəlman ölkə kimi İran heç nə etməyib. Bir çox siyasi konularda Azərbaycanın deyil, Ermənistanın yanında olub. Faktiki təcavüzkar ölkəni dəstəkləyib. İran Ermənistan üçün, son vaxtlar o da məlum oldu ki, hətta Dağlıq Qarabağ üçün "donor" olub. Belə olan təqdirdə birdən birə İranın Azərbaycandakı səfirinin Azərbaycan müsəlmanlarına Qarabağa geri dönmə arzulaması (bu isə işğala son verilmə ilə eyni anlama gəlir) ermənilərin xoşuna gəlməyib. Səbəbi də məlumdur. İndiyədək İran Ermənistanı dəstəkləyib. Ermənistanın İranı "xilas etməsi" iddialarına gəlincə, bu bir erməni cəfəngiyatıdır. Başqa vaxt ABŞ-a yarınmaq üçün İranla heç bir əlaqələrinin solmadığını söyləyirdilər. Səfir Cahangirzadənin bir cümləsi bu dövlətin xislətini ortaya qoydu. İran Azərbaycanın öz torpağını azad etməsini istəyirsə, yəni rəsmi Bakıya münasibətdə səmimidirsə, o zaman Ermənistanı təcavüzkar elan etməli və Azərbaycanın ərazi bütövlüyünü təmin etməsinə dəstək bəyanatı verməlidir".
Xatırladaq ki, iki gün öncə Ramazan bayramı münasibətilə İranın Azərbaycandakı səfiri Cahangirzadənin Azərbaycan xalqına olan təbriki Ermənistanda birmənalı qarşılanmayıb. Səfirin təbrikində səsləndirilən “İnşaallah yaxın gələcəkdə Qarabağın və Qüdsün azad edilməsi Azərbaycan xalqına sevinc bəxş edər” fikirlərini erməni mediası süngü ilə qarşılayıb, ermənilərə xəyanət kimi dəyərləndirib.
Tez tarixi yada salıblar ki, İran guya tarixən Erməbistana və Qarabağa hücumlar edib, yerli əhalini əsir aparıblar. İranı hədəfə alan erməni mediası yazır:
"İran səfirinin təbrikləri cənub qonşumuzun xəyanətini bir daha nümayiş etdirdi. Bu qonşuya görə Qərbdə Ermənistan dəfələrlə tənqidə məruz qalır. Axı, heç kəsə sirr deyil ki, Qərbin ağır sanksiyaları altında olan İran dövlətinin demək olar ki, dünyaya yeganə pəncərəsi Ermənistandır. Bu gün ermənilərə görə İran ayaq üstə qalıb. Buna görə də Tehrandan "təşəkkür"ümüz bu oldu”. (modern.az)