Naqif Həmzəyev: “Onlar gec-tez digər rayonlarla bağlı mina xəritələrini də Azərbaycana verməyə məcbur olacaq”
Xəbər verdiyimiz kimi, iyulun 21-də saat 23 radələrində iki vətəndaşımız Xocalı rayonunun işğaldan azad edilmiş ərazisində minaya düşərək xəsarət alıb.
Xatırladq ki, 10 noyabr bəyanatından sonra onlarla Azərbaycan vətəndaşı mina terrorunun qurbanına çevrilib və təəssüflər olsun ki, məlum proses bu gün də davam etməkdədir.
Mövzu ilə bağlı Moderator.az-a açıqlama verən millət vəkili Naqif Həmzəyev Ermənistanın mina terroruna görə Avropa Məhkəməsinə verilməsinin vacib olduğunu qeyd edib:
“Vətən müharibəsində Azərbaycan ordusu beynəlxalq təşkilatların 30 il ərzində edə bilmədiyi, etmək istəmədiyi problemi 44 gündə həll etdi. Erməni faşistlərini torpaqlarımızdan çıxartdı. Bundan sonra yeni bir təhdid meydana çıxdı ki, bu da torpaqlarımızda ermənilər tərəfindən basdırılan minalardır. Möhtərəm prezidentimizin rəhbərliyi altında dövlətimiz Ağdam, Zəngilan və Füzuli rayonlarının minalanmış ərazilərin xəritəsini Ermənistandan aldı. Hansı ki, onlar ilk vaxtlar belə bir xəritənin mövcudluğunu ümumiyyətlə inkar edirdilər.
Bu minaların təmizlənməsi uzun illər tələb edir. Bu, ağır və təhlükəli prosesdir. 140-dan çox vətəndaşımız bu minalara düşərək ya həlak olub, ya da ağır xəsarət alıb. İki jurnalistimiz də Kəlbəcər istiqamətində minaya düşərək şəhid oldular.
Azərbaycan mina terroru ilə bağlı bütün əlaqədar qurumlar qarşısında məsələ qaldırmaqdadır. Qarşıda duran əsas məsələlərdən biri digər rayonlarla bağlı xəritələrin də əldə edilməsi ilə bağlıdır. Əgər mina terroru davam edəcəksə, təbii ki, Azərbaycan daha ciddi addımlar atmağa məcbur olacaq. Ermənistanın mina terroru Avropa Məhkəməsində gündəmə gətirilməlidir. Düşünürəm ki, Ermənistan gec-tez digər rayonlarla bağlı mina xəritələrini də Azərbaycana verməyə məcbur olacaq”.