“Serbiya və Azərbaycan bir-birinin ərazi bütövlüyünə və suverenliyinə hörmət edir və dəstəkləyir”.

Eurasia Diary xəbər verir ki, bunu Serbiyanın xarici işlər naziri Nikola Selakoviç azərbaycanlı həmkarı ilə keçirdiyi birgə mətbuat konfransında deyib.

O bildirib ki, Azərbaycan Serbiyanın vacib strateji tərəfdaşıdır: “Bu görüş imkan veririk ki, biz əməkdaşlıq imkanlarını müzakirə edək. Biz iki ölkə arasında hər il siyasi dialoqların keçirilməsini təklif etdik”.

N.Selakoviç XİN başçılarının görüşündə iki ölkə arasında iqtisadi münasibətləri müzakirə etdiklərini vurğulayıb: “İqtisadi əməkdaşlıq sahəsində artım tendensiyası var. Bu ilin ilk beş ayında ötən ilin müvafiq dövrü ilə müqayisədə 55 faiz artıb. Serbiyada infrastruktur layihələrində Azərbaycan şirkətləri var, xüsusilə onlar ölkənin qərbində fəaliyyət göstərirlər. Bizim ortaq dəyərlərimiz var. Bu, beynəlxalq hüquqda da əksini tapan ölkələrin ərazi bütövlüyünə və suverenliyinə hörmət və dəstəkdir. Serbiya Azərbaycanın, Azərbaycan Serbiyanın ərazi bütövlüyünü dəstəkləyir. Biz beynəlxalq platformalarda bir-birimizə dəstək vermişik və bu davam edəcək”.

Serbiya XİN başçısı ikitərəfli münasibətlərin yüksək səviyyədə olduğunu diqqətə çatdırıb: “İki ölkə arasında qarşılıqlı səfərlər baş tutur. Bizim bura səfərimiz həm də gələcək səfərlərin baş tutması üçün hazırlıqdır. Biz Bakı və Belqrad arasında birbaşa uçuşların açılmasını, viza liberallaşdırılmasını, turizm və iqtisadiyyat sahəsində mümkün imkanları geniş müzakirə etdik."