“20 Yanvar hadisələri Azərbaycan xalqının bu cür ekstremal vəziyyətlərə doğru yönləndirilməsi üçün siyasi təşkilatlanma modelinin olmadığını göstərdi. Ona görə də nəticələr belə acınacaqlı oldu”.
Bunu millət vəkili, Böyük Quruluş Partiyasının sədri, xalq hərəkatının fəal iştirakçılarından biri Fazil Mustafa EDNews-a açıqlaması zamanı söyləyib.
O, qeyd edib ki, 20 Yanvar, Qarabağ hadisələri fonunda baş verən faciə idi, çünki o zamanlar Azərbaycan Qarabağda gücsüz bir vəziyyətdə qalmışdı.
“Xalq hərəkatı da bunu öz üzərinə götürdü, amma potensial yox idi. Sovet rəhbərliyi bunu zor gücü ilə basdırdı. Əslində, bu dövrdə bütün subyektlər tərəfindən verilən qərarlar yanlış idi. Çünki güc çatmırsa, bu formada dirənişin nəticələri acı olmalı idi. Digər tərəfdən, Sovet rəhbərliyi də müəyyən bir demokratiya vədi vermişdi, amma onu vəhşicəsinə dağıtmaqla bu böyük cinayətə imza atdı”.
Müsahibə zamanı millət vəkili eyni zamanda bildirdib ki, həmin dövrdə Azərbaycan rəhbərliyi idarəetmə qabiliyyətinə sahib deyildilər.
“İndi bizim üçün bu həm də bir ibrət tarixidir ki, siyasi xadimlər, siyasətçilər cəmiyyəti belə səhvlərə, yanlışlara sürükləməsinlər. Biz elə etməliyik ki, bu kimi məsələlər daha çox siyasi müstəvidə həllini tapsın”.
F.Mustafa Qarabağ məsələsinin tənzimlənməsi prosesi haqda da danışıb.
“Hazırda Azərbaycan müstəqil və güclü bir dövlətdir. Bu dövləti daha çevik işləyən, vətəndaşlarla uzlaşmış bir dövlətə çevirməliyik ki, qarşıda bizi gözləyən təhlükələri önləyə bilək”.
