“1990-cı ilin yanvar ayında Azərbaycana kənardan qoşun yeridilməsinə ehtiyac yox idi”.

Bu sözləri EDNews-a Azərbaycan Kommunist Partiyasının sədri Rauf Qurbanov bildirib.

Söhbət zamanı Rauf Qurbanov 20 Yanvar faciəsinə aparan siyasi proseslər və onun nəticələri barədə söz açıb. O hesab edib ki, 1990-cı ilin yanvarın 20-də Bakıda Sovet ordusu tərəfindən dinc əhalinin gülləbaran edilməsində Qərbin böyük dəstəyi olub.

“İlk öncə onu qeyd edim ki, 20 Yanvar faciəsi Azərbaycan tarixində qanlı səhifələrdən biridir. Həmin gün o vaxtki xain SSRİ rəhbərliyinin əmri ilə Sovet ordusu Azərbaycan xalqına amansızca divan tutdu. Yüzlərcə günahsız insan həlak oldu. Bunu heç vaxt unutmaq olmaz. O ki qaldı bu faciənin siyasi tərəflərinə, onu deyim ki, 20 Yanvar məqsədyönlü şəkildə qurulmuş bir siyasi oyun idi. Bu oyunun ssenarisi okeanın o tayında hazırlanaraq, Qarbaçov hakimiyyəti tərəfindən həyata keçirildi. Bu oyunun qurbanları isə siyasətlə məşğul olmayan sadə insanlar idi”.

Partiya lideri həmçinin 20 Yanvar faciəsinə bənzər baş verən digər hadisələrin baş verməsindən danışaraq, onların adını bir-bir sadalayıb:

“ Bənzər faciələr 1986-cı ildə Qazaxıstanın Alma-Ata şəhərində, 1989-cu ildə Gürcüstan, Özbəkistan və Qırğızıstanda da baş verib. Bütün bu siyasi hadisələr SSRİ-ni parçalamaq üçün qurulmuş oyunlar idi”.

Rauf Qurbanov hesab edir ki, Azərbaycanda o zaman baş vermiş təxribatların qarşısının alınması üçün şəhərə kənardan ordunun yeridilməsinə ehtiyac yox idi.

“ Bunun üçün Azərbaycanda yerləşdirilmiş daxili qoşunların və polis qüvvələrinin ölkədə baş verən təxribatların qarşısını almaq və vəziyyəti nəzarətdə saxlamaq imkanları var idi. Əgər vaxtında ciddi tədbirlər görülsəydi, 20 Yanvar faciəsi baş verməzdi”.

Rauf Qurbanov, həmçinin 20 Yanvar faciəsində günahkar şəxslərin hələ də cəzasız qaldığından təəssüfləndiyini bildirib.

“Çox təəssüf ki, bu qətliamın törədilməsində günahı olan şəxslər hələ də cinayət məsuliyyətinə cəlb olunmayıb. Azərbaycan xalqının qanına əli batmış Qarbaçovla yanaşı həmin gecə insanları tankların qarşısına çıxaran şəxslər də məsuliyyət daşımalıdırlar. Heç kəs özbaşına meydanlara çıxmamışdır”.

Yunis Abdullayev