“Sülh danışıqlarının gündəliyində Qarabağın status məsələsi yoxdur, bundan sonra da olmayacaq”.
Bu sözləri politoloq Tofiq Abbasov bildirib. O, Ednews –a açıqlama zamanı danışıqlar prosesində problemlərin tənzimlənməsi qaydalarını yalnız qalib Azərbaycan müəyyən etdiyini bildirib.
Siyasi şərhçinin sözlərinə görə, Qarabağda ermənilərin hüquqlarının və təhlükəsizliyinin təmin olunması kimi problemlər Azərbaycanın daxili məsələsidir. Ermənistanın bu məsələlərə qarışmağa heç bir haqqı yoxdur.
“Ermənistan rəsmiləri daxili auditoriyaya xoş gəlmək, xaricdə yaşayan ermənilərin onları satqınlıqda günahlandırmaması üçün bu kimi məsələləri gündəmə gətirirlər. Onlar öz açıqlamaları ilə Qarabağda ermənilərin taleyinə laqeyd qalmadığını göstərirlər. Bu birtərəfli oyundur. Bunun Azərbaycan tərəfi üçün heç bir əhəmiyyəti yoxdur. Biz daxili problemlərimizi özümüz həll edirik. Ermənistandan fərqli olaraq, üçüncü qüvvələr Azərbaycanda daxili proseslərə müdaxilə edə bilmirlər. Ölkəmizin regional siyasət ilə bağlı öz baxışları və konseptual yanaşmaları var”.
Azərbaycanın Qarabağda ermənilərin hüquqlarının təmin edilməsi məsələsində heç bir öhdəlik götürməyəcəyini deyən Tofiq Abbasov ölkəmizdə yerli ermənilərin digər milli azlıqlar kimi eyni hüquqları və vəzifələri bölüşəcəyini qeyd edib.
“Azərbaycanda yaşamaq istəyən ermənilər ölkəmizin vətəndaşlığını qəbul etməli və konstitusiyamıza hörmət etməlidir. Onsuzda Qarabağ erməniləri mənşəcə Azərbaycan vətəndaşıdırlar. Onların Ermənistanla heç bir əlaqəsi yoxdur.
Hətta əldə etdiyimiz dəqiq məlumatlara görə, həmin bölgədə yaşayan dinc ermənilərin bir qismi Azərbaycan vətəndaşlığını qəbul etmək istəyirlər. Lakin bu insanlar qorxularından səslərini çıxara bilmirlər, çünki onların daima həyatı təhlükə altındadır. Yalnız sakit oturub Azərbaycanın bütün Qarabağ ərazisi üzərində yurisdiksiyasını bərpa etməsini gözləyirlər”.
Ermənistanda radikal müxalifətin keçirdiyi kütləvi nümayişlərin hər iki ölkə arasında sülh prosesinə təsir imkanlarına gəlincə isə, siyasi şərhçi Azərbaycanın hər an sülhün bərqərar olunmasına hazır olduğunu bildirib.
“Ermənistanda sülh prosesi ilə bağlı tədbirlər lazımi səviyyədə görülmür. Ona görə ki, revanşist müxalif ünsürlər prosesə maneçilik törətmək üçün pozucu işlər ilə məşğuldur. Hətta radikal müxalifət Paşinyan hökumətinin devrilməsinə də əl atırlar. Ancaq Ermənistanda kimin hakimiyyətdə olmasına baxmayaraq, heç kəs Azərbaycana təhlükə törədə bilməz. Ordumuz işğalçı ölkənin ordusunu məğlub edib.
Paşinyanı devirib hakimiyyətə gələn siyasi qüvvələr də Azərbaycanla sülh müqaviləsi imzalamağa məcbur olacaq. Bu ölkən qonşuları – Azərbaycan və Türkiyə ilə barışmaqdan başqa yolu yoxdur”.
Qeyd edək ki, Ermənistan Təhlükəsizlik Şurasının sədri Armen Qriqonyan jurnalistlərə açıqlamasında Azərbaycanla sülh müqaviləsi imzalanmasının Qarabağ probleminin həlli demək olduğunu bildirib.
O, Azərbaycanla Qarabağda ermənilərin təhlükəsizliyinin və hüquqlarının təmin olunması, eləcədə Qarabağın statusu ilə bağlı müzakirlər aparıldığını dilə gətirib.
Yunis Abdullayev
