“Paşinyan bu tip çıxışlar edərək hər zaman milliyyətçi siyasi baxışlarını nəzərə çatdırır”.
Bu fikirləri Ednews-a sabiq xarici işlər naziri, politoloq Tofiq Zülfüqarov Ermənistan Baş nazirinin Niderlandın Klingendayl Beynəlxalq Münasibətlər İnstitutunda çıxışı zamanı Azərbaycana qarşı səsləndirdiyi əsassız iddiaları haqqında fikirlərini bildirərkən deyib.
Sabiq nazirin fikrincə, Ermənistan rəhbərliyi açıq şəkildə bəyan edir ki, onlar Qarabağla bağlı iddialarını təzə şəraitdə davam etdirəcəklər:
“Ermənistan hökuməti hər zamankı kimi danışıqlar prosesini uzatmağa çalışır. Onlar bir tərəfdən pozuculuq işləri aparır, digər tərəfdən dünya ictimaiyyətini çaşdırmaq üçün sülhpərvər siyasət yürütdüklərini göstərmək istəyirlər. Bu ziddiyyətli çıxışlar məhz buna işarədir”.
T.Zülfüqarov Azərbaycanın Ermənistana güc tətbiq etməli olduğunu vurğulayıb:
“Hazırda Azərbaycan hərbi, iqtisadi cəhətdən üstünlüyü ələ alıb. Həmçinin Türkiyə ilə birlik formalaşdırıb. Vəziyyətdən istifadə edərək Azərbaycan güc təzyiqi ilə Ermənistanı məcbur etməlidir ki, beynəlxalq qanunlara əməl etsin”.
Qeyd edək ki, Ermənistan Baş nazirinin Niderlandın Klingendayl Beynəlxalq Münasibətlər İnstitutunda çıxışı zamanı Azərbaycana qarşı səsləndirdiyi əsassız iddialar, o cümlədən humanitar məsələlərlə bağlı həqiqətdən uzaq ittihamlar səsləndirib.
Xanlar Əlibəy