Avqustun 9-da Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğanın dəvəti ilə Türkiyəyə işgüzar səfərə gedib.
Səfər çərçivəsində Prezident və onun xanımı Türkiyənin Konya şəhərində keçirilən V İslam Həmrəyliyi Oyunlarında ölkəmizi təmsil edən idmançılarla görüşüb.
Səfər zamanı iki ölkə başçısı arasında son zamanlar regionda baş verən bir-sıra məsələlərin də müzakirəsi gözlənilir.
Görüşün əsas məqsədindən danışan Azərbaycanın keçmiş xarici işlər naziri, politoloq Tofiq Zülfüqarov “Ednews”a açıqlamasında deyib ki, müzakirələrin əsasını Qarabağdakı son vəziyyətin təşkil edəcəyi gözlənilir.
“Tərəfdaşlıq və müttəfiqlik münasibətləri artıq aktual şəkildə icra olunur. Bu tip sıx təmaslar artıq ənənə kimi mövcuddur. Bu səfərin əsas səbəblərindən biri hazırda Qarabağda olan vəziyyətdir. Dünyanın müxtəlif oyunçuları bu mövzuda olan mövqeyi müzakirə edəcək. Hazırda baş verən hadisələr onu göstərir ki, həm Qərb, həm də Rusiya bu məsələ ilə ciddi şəkildə məşğuldur. Bu baxımdan mövqelərin koordinasiyası və ümumi vəziyyətin müzakirəsi bu səfərin əsas məqsədi olacaq”.
Bundan başqa politoloq vurğulayıb ki, hər iki ölkə arasında olan prosesslərə gələcəkdə Orta Asiyadan olan türk dövlətləri də qoşulacaq. “Tərəfdaşlıq və əməkdaşlıq addımlarının koordinasiyası çox vacibdir. Biz görürük ki, bir çox hallarda Azərbaycan və Türkiyə beynəlxalq arenada bir mövqedən çıxış edirlər. Orta Asiya dövlətləri Özbəkistan, Qazaxıstan və digərləri bu prosessə yeni qoşulub. Şuşa bəyənnaməsindən sonra Azərbaycan-Türkiyə münasibətləri daha yüksək səviyyədədir. Hələ ki, Orta Asiyada olan türk dövlətləri bu prosesə qoşulmayıb, lakin ortada siyasi iradə mövcuddur və istək var. Bu səbəbdən də onların bir müddətdən sonra həm Türkiyə, həm də Azərbaycanla əlaqələri daha yüksək səviyyəyə qalxacaq”.
Əbülfət Baxşəli