Səmərqənddə Azərbaycan Prezidenti İlham Əliyevlə həmkarı Vladimir Putin arasında görüş keçirilib.
Ednews "RİA Novosti"-yə istinadən xəbər verir ki, prezidentlərin ikitərəfli əlaqələri, regional məsələləri müzakirə ediblər.
Həmçinin, liderlərin gündəliyində Ermənistan-Azərbaycan sərhəddindəki gərginlik də olub.
"Ermənistan-Azərbaycan sərhədində vəziyyətin gərginləşməsi hamımızı narahat edir. Nə yaxşı ki, əlaqələndirilmiş səylər nəticəsində Bakı və İrəvan arasında baş verənlərin qarşısını almaq mümkün olub, lakin vəziyyət gərgin olaraq qalır", - deyə Putin bildirib.
İlham Əliyev isə bildirib ki, sərhəddə vəziyyət sabitdir, əsas odur ki, münasibətlərin normallaşmasının başlanğıc prosesi pozulmasın.
"Sükut rejiminə əməl olunması onu göstərir ki, nə Ermənistanın, nə də Azərbaycanın genişmiqyaslı eskalasiya planları olmayıb", - deyə dövlətimizin başçısı bildirib.
Qeyd edək ki liderlərin görüşü Şanxay Əməkdaşlıq Təşkilatına (ŞƏT) üzv ölkələrin Dövlət Başçılarının 22-ci Zirvə Toplantısı çərçivəsində keçirilib.
