Hindistan, İran və Ermənistan Azərbaycana və Türkiyəyə qarşı üçtərəfli platformanın yaradılması ətrafında müzakirələr aparır.
Sosial şəbəkələrdə yayılan məlumatlara görə, yaxın zamanda bu platforma ilə bağlı imzalanacaq müqavilədə Ermənistanın təhlükəsizliyinin təmin edilməsi məsələsi xüsusi yer alacaq. Bəzi ekspertlər iddia edirlər ki, Dehli, Tehran və İrəvanın əsas məqsədi üçtərəfli format çərçivəsində yeni marşrut yolu ilə Zəngəzur dəhlizinin reallaşmasını qarşısını almaqdır.
Məsələ ilə bağlı Ednews-a şərh verən sabiq xarici işlər naziri Tofiq Zülfüqarov hesab edir ki, üç dövlət tərəfindən irəli sürülən platformanın özünü doğrultması ilə bağlı hələki heç bir zəmanət yoxdur.
O, qeyd edib ki, bu layihənin perspektivi çox azdır.
“Əslinə qalsa, bu layihə “Şimal-Cənub Beynəlxalq Dəhlizi”nin hər hansı bir versiyası ola bilər. Bir neçə il bundan əvvəl Rusiya, Azərbaycan və İran rəhbərləri arasında keçirilən mühüm görüşdə bu dəhlizin mümkünlüyü, onun regional ölkələr üçün əhəmiyyəti və müsbət təsirləri barəsində ətraflı müzakirələr və fikir mübadilələri aparılıb. Xüsusilə, Moskva, Bakı və Tehran bu dəhliz çərçivəsində bir sıra layihələrin həyata keçirilməsi üçün normativ hüquqi sənədlər imzalayıblar. Yəni, layihələr Şimali Avropa və Rusiyadan başlayaraq Fars köfrəzinə və Hindistana qədər və ya əksinə tranzit yüklərin bir çox vasitələrlə daşınmasının sürətləndirilməsinə istiqamətlənib”.
Tofiq Zülfüqarov Ermənistanın da daxil olduğu Dehli və Tehranın irəli sürdüyü yeni marşrut yolunda logistik baxımdan şübhəli məqamların olduğunu bildirib.
“Bu layihənin reallaşması hələki sual atındadır. Çünki, ilk növbədə Hindistan-İran əməkdaşlığında bəzi problemlər qalmaqdadır. Hər iki dövlət bir sıra regional məsələlər üzərində hələ ümumi razılığa gələ bilməyiblər. İkincisi, Hindistan İranın Fars köfrəzi sahillərində liman və logistik infrasturuktur obyektlər tikməsinə baxmayaraq, İranda Şimal-Cənub dəhlizini təmin edən dəmir yolların və digər kommunikasiyaların tikintisi maliyyə sıxıntısı və sanksiyalar üzündən uzun zamandır ləngiyir. Bu kimi səbəblər Ermənistanın arzuladığı layihənin həyata keçməsinə imkan verməyəcək. Həm də onu da nəzərə almaq lazımdır ki, Şimal-Cənub dəhlizini kənara qoyub yeni bir regional layihə üzərində işləmək mənasızdır və məntiqə uyğun deyil”.
Sonda T. Zülfüqarov Hindistan-İran-Ermənistan üçtərəfli platformanın İranın təşəbbüsü olması ilə bağlı iddialara da aydınlıq gətirib.
“Əlbəttə, hesab etmək olar ki, üçtərfəli platforma İranda siyasi elita və bəzi dairələr tərəfindən geosiyasi məqsədlər üçün irəli sürülüb. Amma belə bir layihənin ölkəmizə və Türkiyəyə qarşı olması ilə bağlı dolaşan fikirləri əsassız hesab edirəm. Çünki onunla əlaqəli səsləndirilən bəyanatlar qısa müddətdə sonra siyasi gündəmdən çıxarılacaq”.
