“Qarabağda rus sülhməramlılarının mandatının uzadılması Azərbaycan tərəfindən qəbul olunmayacaq”.
Bu sözləri Ednews-a açıqlamasında politoloq Natiq Miri bildirib.
Soçidə Rusiya, Azərbaycan və Ermənistan liderləri arasında üçtərəfli görüşün yekunları barədə birgə bəyanatın müddəalarını şərh edən Natiq Miri qeyd edib ki, Moskvanın bu görüşü təşkilində məqsədi prosesləri yenidən öz nəzarəti altına almaqdır.
“Moskvanın növbəti Soçi görüşünü keçirməsi Azərbaycan-Ermənistan münasibətlərinin nizamlanması prosesində yenidən söz sahibi olduğunu nümayiş etdirmək idi. Rusiya rəhbərliyi bu prosesdə konkret nəticələr əldə edən Brüsselin təşəbbüsünü arxa plana çevirməyə, ən əsası yaxın gələcəkdə sülh müqaviləsinin onun vasitəçiliyi ilə imzalanmasına çalışır”.
Erməni mediasında Rusiyanın 15 bəndlik sülh müqaviləsi təklifi ilə bağlı söz-söhbətlərə münasibət bildirən politoloq bildirib ki, hər iki tərəf arasında sülh müqaviləsi yalnız 5 prinsip əsasında imzalanmalıdır.
“Azərbaycan beynəlxalq hüququn prinsiplərinə uyğun olaraq beş prinsip müəyyənləşdirib. Qərb tərəfindən də müsbət qarşılanan bu prinsiplər əsasında Azərbaycan-Ermənistan münasibətləri nizamlanmalıdır. İrəvan bizim təklif etdiyimiz sənədi qəbul etməlidir. Çünki buna qarşı alternativ təklif olmayacaq və ola da bilməz. İlham Əliyev Putinlə görüşündə sülh müqaviləsi ilə bağlı ciddi mövqeyini diqqətə çatdırdı”.
Politoloq Vladimir Putinin sülh müqaviləsinin imzalanması üçün hər iki tərəfin güzəştlər etməli olduğu barədə çıxışını bu cür şərh edib:
“Moskva regionda öz geosiyasi maraqlarını təmin etmək üçün hər vasitədən istifadə edir. Belə olan halda sülh müqaviləsinin o qədər də rahat şəkildə imzalanmayacağını anlamaq olur. Moskva hesab edir ki, müqavilə onun şərtləri daxilində imzalmalıdır. Bu da Bakı və İrəvanı onun geosiyasi maraqlarına xidmət etməyə vadar edəcək. Rusiya rəhbərliyinin təkliflərini nəzərdən keçirsək görərik ki, sənəddə Qarabağda rus sülhməramlılarının mandatının uzadılması, Ermənistan-Azərbaycan sərhəd ərazilərinin KTMT-nin nəzarətinə verilməsi və Qarabağın taleyinin qeyri-müəyyən gələcəyə saxlanılması ilə müddəalar yer almalıdır. Azərbaycan bu müddəalar ilə heç vaxt razı olmayacaq. Nəhayət, Rusiya noyabr bəyanatının 9-cu maddəsini əsas gətirərək, regional kommunikasiyaların açılmasını da nəzarətə götürmək istəyir. Bunu da Ermənistan hakimiyyəti qəbul etmir”.
Sonda Natiq Miri bildirib ki, nə Ermənistan, nə də Rusiya 10 noyabr bəyanatının öhdəliklərini yerinə yetirmirlər.
“Qarabağda rus sülhməramlıları öz missiyasına uyğun fəaliyyət göstərmirlər, əksinə həddini aşan davranışlara yol verirlər. Sülhməramlılar ərazilərimizdə separatçı rejimin dayanıqlığına imkan yaradırlar, separatçı-terrorçu dəstələrin və Ermənistan qoşunlarının qanunsuz fəaliyyətinə bilərəkdən göz yumurlar. Doğrusunu desək, sülhməramlıların varlığı Azərbaycanın həmin ərazilər üzərində suverenliyinin bərpasına əngəl yaradır. Qarabağ məsələsinin sülh müqaviləsi çərçivəsində ədalətli şəkildə tənzimlənməsi Rusiyanın marağında deyil”.
Yunis Abdullayev