“Qədim dövlətçilik ənənəsinə malik olan Azərbaycan türkləri fars dövlətçiliyinin himayəsi altında yaşamaq istəmirlər. Onlar öz mübarizəsini məqsədlərinə nail oluna qədər davam etdirəcəklər”.
Bu sözləri Ednews - a açıqlamasında güneyli siyasi şərhçi Çingiz Göytürk İranda son siyasi prosesləri şərh edərkən bildirib.
Söhbət zamanı o, qeyd edib ki, İranda sosial tələblər ilə başlayan nümayişlər artıq siyasi məcraya keçib.
“43 il ərzində heç bir problemin həllinə nail ola bilməyən və heç bir məsələnin nizamlanmasına yönələn addım atmaq iqtidarında olmayan İslam Cümhuriyyəti normal siyasi və iqtisadi sistem qurmaq əvəzinə öz haqlarını tələb edən vətəndaşları heç bir əsası olmadan ittiham edir, onları xarici dövlətlərin maraqlarına xidmət etməkdə günahlandırır. Bu rejim ənənəvi güc metodları və vasitələrdən istifadə edərək əvvəlki nümayişləri, etirazları və aksiyaları amansızca yatırırdı. Amma artıq bu günlərdə xalq rejimin qorxu və təhdid maşınından qorxmurlar və çəkinmirlər. Rəhbərlik nə qədər şiddətə əl atsa da, insanlar öz etirazlarını davam etdirmək əzmindədirlər. Xüsusilə, ölkənin Xuzistan, Bəlucistan və şimal-qərb bölgələrində ərəb, bəluc və kürd etirazçılara və nümayişçilərə qarşı terror aktları və çox saylı cinayətlər törədilir. Rejimə bağlı olan təhlükəsizlik qüvvələri qorxutmaq yox, sırf öldürmək məqsədi ilə dinc nümayişçilərə güllə atırlar. Kürdlərin yaşadığı bölgələrdə qarşılıqlı silahlı insidentlər müşahidə edilir. Bu İslam Cümhuriyyətinin öz vətəndaşlarına və insanlarına qarşı müharibə elan etməsi deməkdir”.
Çingiz Göytürkün sözlərinə görə, ölkədaxili proseslərdə fəal iştirak edən Azərbaycan Milli Hərəkatının əsas hədəfi öz milli dövlətçiliyini bərpa etməkdir.
“Milli Hərəkatımızın məqsədi və amalı rejimin dəyişməsi ilə bağlı deyil. Dövlətin mahiyyəti dəyişmədisə və İran olduğu kimi fars dövlətçiliyini davam etdirdisə, onda Azərbaycan türkləri heç nəyə nail olmayacaqlar. Biz buna Pəhvəli rejimindən İslam Cümhuriyyətinə keçid dövründə aydın şəkildə şahidi olduq. Şah rejiminin devrilməsində Azərbaycan türkləri fədəkarlıqlar göstərməsinə baxmayaraq, qarşılığında bu millətə heç bir milli və mədəni hüquq verilmədi. Azərbaycan Milli Hərəkatı bu təcrübəyə malik olduğundan öz haqlarını İranın müxalif qüvvələrinə və dünyaya ictimaiyyətinə çatdırmaq üçün əlindən gələni edir. Milli hərəkatımızın tərəfdarları nümayişlərdə və etirazlarda ümumi şüarlar yox, öz milli şüarlarını səsləndirirlər. Öz tələblərini ortaya qoyan Azərbaycan türkləri digər qeyri-fars millətlərinə örnək olmağı da bacarıb. Əhvazda və Xuzistanda ərəblərin, Bəlucistanda bəlucların milli hərəkatının üzə çıxmasında Milli Hərəkatımızın rolu danılmazdır”.
Güneyli fəal, həmçinin Milli Hərəkatın son nümayişlərdə şəhidlər verdiyini, eləcə də Təbrizdə minlərlə Azərbaycan türkünün rejimin həbsxanasına salındığını bildirib.
“Milli Hərəkatımız öz milli mübarizəsindən geri çəkilməyib və çəkilməyəcəkdir. Heç kəs bizim mübarizəmizi kölgə altına qoya bilməyəcək. Azərbaycan türkləri öz istəkləri və iradəsi əsasında öz milli hökumətini qurmağa nail olacaqdır”.
Sonda Çingiz Göytürk qeyri-fars millətlərinin də öz milli dövlətinin formallaşdırılması uğrunda mübarizə apardığını vurğulayıb.
Ərəblər, Bəluclar və Kürdlər öz istiqlaliyyət arzularını açıq şəkildə ifadə edirlər. Bu xalqlar daxil olmaqla dövlətçilik ənənəsinə malik olan Azərbaycan türkləri də artıq fars dövlətçiliyinin himayəsi altında yaşamaq istəmirlər. Hesab edirəm ki, hazırki proseslərin fonunda iki yol var. Ya İran parçalanacaq və burada müstəqil dövlətlər yaranacaq, ya da Azərbaycan dövlətçiliyi ətrafında millətlər birləşib fars millətçiliyindən və şovinizmindən özlərini xilas edəcəklər. Bu iki kəsinliklə mümkündür. Bunun ötəsində üçüncü bir yol yoxdur.
Yunis Abdullayev
