Qarabağda hərbi-siyasi vəziyyət günü-gündən gərginləşməkdədir. Rusiya sülhməramlılarının müvəqqəti nəzarəti altında olan ərazilərimizdə qanunsuz erməni silahları müxtəlif istiqamətlərdən Azərbaycan ordusunun mövqelərini məqsədyönlü şəkildə atəş altına tuturlar.

Dövlət Təhlükəsizlik Xidmətinin və Müdafiə Nazirliyinin çağırışlarına məhəl qoymayan rus sülhməramlıları erməni separatçıların özbaşnalıqlarına, o cümlədən bölgəyə silah-sursat daşınmasına və qanunsuz səfərlərin edilməsinə şərait yaradır.

Bir çox ekspertlər hesab edirlər ki, DTX, Gömrük və Sərhəd Xidməti çərçivəsində Azərbaycan hakimiyyəti yeni Laçın dəhlizi ətrafında postlar qurmalı və Ermənistanın Qarabağla əlaqəsini kəsməlidir.

Lakin digərlərinin fikirlərinə görə, bu istiqamətdə ciddi addımın atılması bölgədə Rusiya və Azərbaycan arasında müəyyən mənada qarşıdurma yarada bilər.

Məsələ ilə bağlı Ednews-a açıqlamasında politoloq Tofiq Zülfüqarov qeyd edib ki, bu kimi məsələlərə yanaşma bir az fərqli olmalıdır.

“Hesab edirəm ki, Azərbaycan Silahlı Qüvvələrinin rus sülhməramlıları ilə paralel şəkildə Laçın dəhlizi ətrafında postları fəaliyyət göstərməlidir. Dövlətimizin öz xalqının təhlükəsizliyi məsələsində mühüm tələbləri var. Silahlı birləşmələrimiz orada bir müddət fəaliyyət göstərməklə Ermənistan və Qarabağ arasında gediş-gəlişə nəzarət edəcək, eyni zamanda anti-Azərbaycan siyasəti aparan şəxslərin qanunsuz səfərlərini və silah-sursatın daşınmasını dayandıracaq. Bundan sonra ermənilər daha yaxşı başa düşəcək ki, bu torpaqların sahibi Azərbaycandır. Rus sülhməramlıları isə öz yerlərində qalıb təhlükəsizliklə bağlı öhdəliklərini yerinə yetirəcəklər. Azərbaycan bu məsələni Rusiya ilə siyasi və diplomatik kanallar vasitəsilə razılaşdıracaq”.

Rusiyanın mənfi reaksiyasına gəlincə isə politoloq qeyd etdi ki, hamı başa düşməlidir ki, bu ərazilərdə şərtləri irəli sürən Azərbaycandır.

“Ölkəmiz öz suveren hüquqları çərçivəsində rus sülhməramlılarını öz ərzisinə çağırıb. Onların beş illik fəaliyyəti bizim qərarımız əsasında razılaşdırılıb. Burada Rusiyanın razı olub və ya olmayacağı ilə bağlı heç bir söhbət gedə bilməz”.

Ermənistan və Qarabağ erməniləri arasında təmaslara toxunan Tofiq Zülfüqarov vurğulayıb ki, yalnız dövlət qanunları çərçivəsində Azərbaycan hakimiyyəti hər iki tərəf arasında iqtisadi və humanitar təmasların formalaşmasına imkan yarada bilər. Onun sözlərini görə, Azərbaycanın hələki Ermənistan və Qarabağ erməniləri arasında münasibətləri və təmasları tam kəsməklə bağlı bir niyyəti yoxdur.

Eyni zamanda politoloq əlavə edib ki, rəsmi Bakı dövlətin qanunlarına tabe olan və ölkənin ərazi bütövlüyünə hörmət edən Qarabağ ermənləri ilə təmaslar qurmağa hazırdır.

“Dövlətimizin qanunlarını tanıyan Qarabağ erməniləri potensial olaraq Azərbaycan vətəndaşları ola biləcəklər. Lakin qanunlarımıza zidd fəaliyyət göstərən və öz qanunsuz əməllərini davam etdirən ermənilər, eləcə də Arutyunyan və Vardanyan kimi timsalında şəxslər ərazilərimiz tərk edəcəklər”.

Azərbaycan və Rusiyanın dövlət rəhbərləri - İlham Əliyev və Vladimir Putin arasında son on gündə üç dəfə telefon danışığı ətrafında dolaşan müxtəlif fikirlərə münasibət bildirən Tofiq Zülfüqarov qeyd edib ki, iki dövlət rəhbərinin söhbətində 10 noyabr bəyanatının öhdəlikləri, əsasən erməni silahlı birləşmələrinin ərazilərimizi tərk etməsi və Zəngəzur dəhlizinin açılması ətarafında fikir mübadilələri aparıla bilər.

“Əlbəttə, ikitərəfli telefon danışığında ictimaiyyətə açıqlanmayan taktiki məsələlərin müzakirə edilməsini ehtimal etmək olar. Məsələn, Rusiya hakimiyyəti ilə sıx təmasları olan Vardanyanın separatçı qurumda yüksək vəzifə tutmasına imkan verilməsi Azərbaycanın hakim təbəqəsində ciddi narahatçılıq doğurub. Təbii ki, bu bizim üçün qəbul edilməzdir. Bundan başqa, digər gizli məsələlərə də toxunala bilər”.

Yunis Abdullayev