Ermənistan Təhlükəsizlik Şurasının katibi Armen Qriqoryan bu həftə Fransaya işgüzar səfərə gedəcək. Demək olar hər ay erməni rəsmiləri Fransaya səfər edir, orada Azərbaycan əleyhinə təlimatlar alırlar. Elə Paşinyanın Makronla görüşləri də bunun bariz nümunəsidir.

Bu görüşün arxasında nə məqsədlər dayanır? Qarabağda yenidən təxribatlar ola bilərmi?

Ednews bu barədə politoloqların fikirlərini öyrənib.

Poiltoloq Şahin Cəfərlinin sözlərinə görə Azərbaycan müharibədəki qələbədən sonra sülh prosesində şərt diktə edən tərəfə çevrilib. Ötən müddətdə rəsmi Bakı öz diplomatiyasını sərt güc elementi ilə müşayiət edərək Ermənistan üzərində təzyiq yaratmaqla ona Azərbaycanın maraqlarına uyğun sülh müqaviləsi imzlatmağa çalışıb. Sərhəddə zaman-zaman baş verən hərbi toqquşmalar da Azərbaycanın bu siyasətindən irəli gəlirdi.

“Amma zaman keçdikcə Ermənistan müharibədəki sarsıdıcı məğlubiyyətin şokundan yavaş-yavaş çıxmağa başlayır. Rusiyadan istədiyi və gözlədiyi dəstəyi ala bilməyəcəyini görən Ermənistan hökuməti başqa müttəfiqlər və tərəfdaşlar axtarışına çıxıb. Bölgədə İranın timsalında belə bir müttəfiqin tapıldığını söyləmək olar. Əslində İranın bu regiondakı maraqları heç yerə qeyb olmamışdı və məlum məsələ idi, sadəcə olaraq, rəsmi Tehran müharibədən əvvəlki dövrdə nisbətən neytral mövqe ortaya qoymaqla, öz gerçək niyyətlərini pərdələyirdi və Azərbaycandakı nüfuzunu da qorumağa çalışırdı. Lakin müharibədən sonra yaranan yeni reallıqları öz milli təhlükəsizlik maraqları baxımından təhdid kimi qiymətləndirən İran rejimi kartlarını açıq oynamaq məcburiyyətində qalaraq gerçək mövqeyini ortaya qoydu. Təsadüfi deyil ki, bunun nəticəsində İran-Azərbayan münasibətlərində indiyədək görünməmiş səviyyədə gərginlik yarandı. 

Politoloq söhbət əsnasında bildirdi ki, Avropada isə Ermənistanın ənənəvi olaraq əsas tərəfdaşı Fransadır. Ermənistan Avropa Birliyinin lider dövlətlərindən biri, BMT TŞ-nin daimi üzvü olan Fransanın təsir gücündən və imkanlarından yararlanmaq istəyir.

“Fransanın da Cənubi Qafqaz regionunda yeni siyasət formalaşdırmağa çalışdığını və istinad nöqtəsi kimi Ermənistana üstünlük verdiyini müşahidə edirik. Bu səbəbdən iki ölkə münasibətlərinin inkişaf etməyə başlaması çox da sürpriz deyil”

Politoloq Anar Əliyev açıqlamasında isə bildirib ki, Azərbaycanla Ermənistan arasında danışıqlarda Ermənistan hökumətinin xüsusi nümayəndəsi statusu daşıyan Ermənistan təhlükəsizlik Şurasının katibi Armen Qriqoryanın Avropaya növbəti turnesi son zamanlar Ermənistanın yüksək çinli məmuralarının Avropaya etdiyi çoxlu sayda səfərlərdən biridir:

"Qriqoryanın həm Fransaya, həm də Almaniyaya səfərləri çərçivəsində əsas hədəf təbii ki, son günlər Azərbaycan Prezidentinin dilindən səslənən bir çox ciddi məsələlərin müzakirə olunması və Azərbaycanın ortaya qoyduğu iradəyə qarşı Qərb dövlətlərinin, xüsusilə də Fransanın Ermənistanı alət edərək atacağı addımların müzakirəsi xarakteri daşıyacaq. Çünki Azərbaycan Prezidenti cənab İlham Əliyev artıq qəti şəkildə Cənubi Qafqazda proseslərin tənzimlənməsində Fransanın tərəf kimi çıxış edə bilməyəcəyini və Azərbaycanın buna heç bir halda imkan verməyəcəyini bəyan edib. Dekabrın əvvəllərində Avropa İttifaqı formatında Azərbaycan və Ermənistan liderlərinin görüşünün təşkil edilməsi və Ermənistanın bu görüşün keçirilməsi üçün şərt irəli sürməsinə Azərbaycan Prezidentinin ortaya qoyduğu qətiyyətli mövqe Fransa tərəfindən çox narahatlıqla, müəyyən ehtiyatla qarşılandı. Fransa tərəfi Azərbaycanın belə sərt və qəti mövqe sərgiləyəcəyini gözləmirdi. Çünki Fransanın bu günə qədər, xüsusilə də 10 noyabr üçtərəfli bəyanatı imzalandıqdan sonra Cənubi Qafqazda baş verən proseslərlə bağlı atdığı addımların hamısının mahiyyətində məhz yenidən Cənubi Qafqazdakı proseslərin tənzimlənməsində tərəf kimi iştirakı və bu proseslərə daxil olmaq istəyi ilə bağlı idi. Bütün planların hamısı Fransanın Cənubi Qafqazdakı maraqlarının təmin olunmasına istiqamətlənmişdi. Hesab edirəm ki, bu mənada Ermənistanın davamlı şəkildə təxribatlara təhrik edilməsi, Ermənistanla Azərbaycan arasında münasibətlərin nə ayrılıqda Rusiya formatında, nə də Avropa İttifaqı Şurası formatında tənzimlənməsinə imkan verməməklə özünün aparıcı rolunu, Fransaya olan ehtiyacı ortaya qoymağa çalışırdı. Baş verən proseslər Fransanın planlarının reallaşmadığını, tam əksinə, Fransanın vasitəçilik missiyasını tamamilə aradan qaldırmış oldu. Bu mənada hesab edirəm ki, Armen Qriqoryanın Fransaya və Almaniyaya çağırılmasında əsas hədəflərdən biri Ermənistan üzərindən Azərbaycana hansı təzyiq alətlərindən və vasitələrindən istifadə edilə biləcəyini bir daha müzakirəyə çıxarmaq və Ermənistanı növbəti təxribatlara təhrik etmək məqsədi daşıyır”.

Oğuz Ayvaz

• Tag:
• Qarabağ
• Azərbaycan