İsveçrədə “Güney Azərbaycan Hüquqlarının Müdafiə Təşkilatı” yaradılıb.
Məlumata görə, bu qurum BMT-də daxil olmaqla beynəlxalq təşkilatlara İranın azərbaycanlılar yaşayan ərazilərdə molla rejimi tərəfindən insan haqqlarının pozulması ilə bağlı sənəd və məlumatlar təqdim edəcək.
Yeni yaradılan təşkilatın fəaliyyət istiqamətləri və prinsipal hədəfləri ilə bağlı məsələni İsveçrədə yaşayan güneyli fəal Rəhim Sulduzlu ilə söhbətləşib.
Rəhim Sulduzlu Ednews-a açıqlamasında ilkin olaraq qeyd edib ki, İranda 74 gündür etirazlar və nümayişlər davam edir. Onun sözlərinə görə, etirazların baş verdiyi ərazilərdə, xüsusilə azərbaycanlıların yaşadığı bölgələrdə insan hüquqları kobudcasına pozulur.
“ Şəhidlərimiz, yaralılarımız və siyasi məhbuslarımız var. Azərbaycan Türk milləti molla rejiminin qəddarlığını iliyinə qədər hiss edir. Bundan başqa, dünya ictimaiyyəti də İranda prosesləri yaxından izləyir. Məhz buna görə, Almaniyanın və İslandiyanın təşəbbüskeşliyi ilə BMT-nin İsveçrədəki İnsan Hüquqları Şurasında növbədənkənar iclas keçirilib. İclasda müzakirələr və dinləmələr keçirilən zaman biz Güney azərbaycanlıları səsimizi çatdırmaq üçün qurumun binasının qarşısında aksiya keçirdik. İclasda qətnamə qəbul olundu. Bu qətnamədə İranda rejimin vətəndaşlara, o cümlədən ölkədə yaşayan digər xalqların nümayindələrinə qarşı törətdiyi cinayətlərin araşdırılması üçün ortaq komissiyanın yaradılması ilə bağlı qərar verilib”.
Rəhim Sulduzlu təşkilat çərçivəsində yaxın zamanda görüləcək işlər və tədbirlər barədə məlumat verib.
“Tehran rejiminin işgəncəsinə və təhqirlərinə məruz qalan soydaşlarımızın problemlərini beynəlxalq ictimaiyyətdə tanıtdırmaq üçün Güney Azərbaycan Hüquqlarının Müdafiəsi Təşkilatını yaratdıq. Bu təşkilat çərçivəsində həbs olunan, yaralanan və şəhid olan soydaşlarımızın gerçəklərinin beynəlxalq təşkilatlar və müxtəlif insan hüquqları qurumları ilə əməkdaşlıq çərçivəsində təbliğatı ilə məşğul olacağıq”.
Rəhim Sulduzlu digər güney fəallarla bərabər təşkilatın qeydiyyata alınması ilə məşğul olduqlarını bildirib.
“Yaxın günlərdə təşkilatın qeydiyyatını həyata keçirmək üçün BMT-nin Cenevrədəki nümayindəliyinə səfər edəcəyik. Orada ilkin olaraq təsbit ediyimiz şahidlərimizin və rejimin zidanlarında işgəncələrə düçar olan soydaşlarımızın siyahısını təqdim edəcəyiz. Sonradan isə təşkilatın rəhbərini və idarə heyətini müəyyənləşdirəcəyik”.
Yunis Abdullayev