"Moskva layihəsi çoxdan, bu ilin əvvəlində hazırlanıb və Rusiyanın ümumi baza tapmağa kömək etmək istəyinin göstəricisi kimi tərəflərə təhvil verilib”. 

Bu sözləri Rusiyanın xarici işlər naziri Sergey Lavrov azərbaycanlı həmkarı Ceyhun Bayramov ilə görüşdən sonra keçirilən mətbuat konfransında deyib.

S.Lavrov onu da əlavə edib ki, Ermənistan və Azərbaycan Xarici İşlər nazirlərinin Vaşinqton görüşü zamanı Azərbaycan tərəfi mümkün sənədin növbəti variantını təqdim edib, ABŞ paytaxtından qayıtdıqdan sonra isə Ermənistan nümayəndələri əks təkliflərini təqdim ediblər.

Ednews-a açıqlama verən politoloq Yeganə Hacıyevanın sözlərinə görə, Ermənistan təklif etdiyi sülh müqaviləsi nə Azərbaycanı, nə də Rusiyanın maraqlarını ifadə etmir: 

“Sülh sazişinə gedən yolda Azərbaycan tərəfinin təklifləri ilk gündən necədirsə indi də elə davam edir. Burada fərqli bir yanaşma yoxdur. Bu beş bənd beynəlxalq hüquq və regional reallıqların, Azərbaycanın milli maraqlarının ifadəsi ilə xarici siyasətinin strategiyasında öz əksini tapmış bəndlərdir. Bu beş bənd ilk gündən dəyişməyib indi də fərqli deyil. Ermənistanın Azərbaycana fərqli beş təklifi varmış kimi dezinformasiya buraxır. Bu dezinformasiya üzərindən manipulyasiya etməyə cəhd edir. Ancaq onu da qeyd etmək lazımdır ki, bu cəhd təkcə Ermənistan tərəfindən deyil həm də Rusiya tərəfindən aparılır. Nə Ermənistan tərəfinin, nə də Azərbaycan tərəfinin sülh sazişinə görə, Qarabağın statusuna dair bir bənd yoxdur. Baxmayaraq ki, biz münaqişənin faktiki iki tərəfiyik. Ancaq Rusiyanın sülh sazişi ilə bağlı təkliflərində isə statusla bağlı mövzunu gələcək illərə buraxmaq kimi bir təklifi var. Rusiyanın təklifi sonsuz status kvo olmasıdır. Təklif edilən sülh müqaviləsində açıq olaraq Rusiya bunu istəyir, amma Azərbaycan buna razı deyil.  Bizim də təklifimiz ümumilikdə bəllidir və heç bir fikir dəyişməyib. Ermənistanın isə absurd bir təklif paketi var idi. Paralel dünyada yaşayan Ermənistan paralel reallıqlardan təkliflər verir. Verilən təkliflər nə Azərbaycanı, nə Rusiyanı, nə də digər ölkələrin maraqlarını ifadə etmirdi”.

Əbülfət Baxşəli