Azərbaycan Respublikası ilə Türkiyə Respublikası arasında bağlanmış hərbi sahədə əməkdaşlıq haqqında sazişə əsasən Azərbaycan və Türkiyə birgə hərbi təlimlər həyata keçirir.
Azərbaycan ordusu və Türkiyə Silahlı Qüvvələrinin müxtəlif qoşun növlərinin şəxsi heyəti, döyüş və xüsusi təyinatlıları, mühəndis-istehkam texnikası, həmçinin hərbi aviasiya vasitələrinin cəlb olunması ilə keçirilən təlimlər Bakı, eləcə də Astara, Cəbrayıl və İmişli rayonlarının ərazilərini əhatə edir.
Təlimlərdə müasir döyüş üsullarının istifadəsi, xüsusilə artilleriya, aviasiya və digər qoşun növlərinin hərbi əməliyyatlarda tətbiqi, çaylar üzərindən keçid açmaq məqsədilə panton körpülərin salınması və şərti düşmənin dərinliyinə desant endirilməsi üzrə müxtəlif tapşırıqlara önəmli diqqət verilib.
Bəzi ekspertlərin fikrincə, hərbi təlimlərinin son vaxtlar ölkəmizə qarşı təxribatlar törətməyə meyl edən İran, Ermənistan və Rusiyaya qarşı ciddi mesaj olduğu bildirilir.
Məsələ ilə bağlı Endews –a açıqlamasında politoq İlyas Hüseynov bu kimi iddiaları doğru hesab edib.
Onun sözlərinə görə, ikitərəfli hərbi təlimlərin mahiyyəti region dövlərinə siyasi mesaj ötürməkdir.
“Vətən müharibəsinin gedişində Türkiyə Azərbaycana siyasi və mənəvi dəstək görsədib. Türkiyənin Qafqazda son dövrlər güclənməsi müşahidə olunur. Xüsusilə, 44 günlük müharibədən sonra yeni geosiyasi konfiqurasiya Türkiyə və Rusiyanın Cənubi Qafqazda mövqeyini daha da möhkəmləndirib. Eyni zamanda, biz İranın aqressiv hərəkətlərini görürük. Rəsmi Tehran açıq şəkildə ölkəmizə qarşı təhdidlər və təxribatyönlü açıqlamalar yayır. Qüdsə gedən yolun Bakıdan keçməsi mesajı kimi hərəkətlər yol verilməzdir. Azərbaycan bu mesajlar qarşısında sakit durmayacaq. Buna görə də təhlükəsizlik tədbirlərinin gücləndirilməsi istiqamətində ciddi addımlar atılır.
Onu da qeyd edim ki, iki dövlət arasında imzalanan Şuşa bəyannaməsi Türkiyəni Azərbaycanın hərbi-siyasi müttəfiqini çevirib. Hazırda bu bəyannamənin bütün maddələri işlək vəziyyətdədir. Şuşa bəyannaməsi məhz Azərbaycan və Türkiyənin birgə hərbi təhlükəsizliyinin və siyasi sabitliyinin təmin olunmasına istiqamətlənib”.
İlyas Hüseynov, həmçinin Türkiyənin Cənubi Qafqazda son proseslərə diqqətlə yanaşdığını vurğulayıb.
“Regionda karbohidrogen ehtiyatlarının qorunması, yeni kommunikasiyaların fəaliyyətə başlaması və regional əməkdaşlığın inkişaf etməsi rəsmi Ankaranın geosiyasi maraq dairəsindədir. Türkiyə Qafqazda xalqlararası sülhün qorunmasının tərəfdarıdır. Nəzərə alaq ki, Azərbaycan-Ermənistan münasibətlərinin normallaşması prosesi ilə yanaşı Ankara və İrəvan arasında ikitərəfli əlaqələrin qurulması istiqamətində siyasi dialoq da davam etməkdədir. Türkiyə ilə aparılan hazırki hərbi təlimlər də bölgədə sülhün və təhlükəsizliyin təminatına xidmət edir”.
Hərbi ekspert Tərlan Eyvazov Ednews –a açıqlamasında hərbi təlimlərin əsasən İran və Ermənistana ciddi mesaj olduğunu hesab edib.
“Biz hər zaman Türkiyə ilə bərabər hərbi təlimlər keçirmişik. Amma məxsusi olaraq növbəti təlimlər üçün sərhədyanı bölgənin seçilməsi İrana ciddi mesajdır. Bildiyimiz kimi, son iki ildə İran hərbiçiləri Araz çayı boyunca təxribatyönlü hərbi təlimlər həyata keçirib. Biz də sakit durmayaraq ötən ay Xüsusi Təyinatlı Qüvvələrin təlimini keçirtdik. Azərbaycan və Türkiyə ordusunun bu dəfəki genişmiqyaslı hərbi təlimlərinə xüsusi təyinatlılar ilə yanaşı quru qoşunları, raket-artilleriya birlikləri və dəniz qüvvələri cəlb edilibdir. Fikir verərsiniz ki, Araz çayı üzərində xüsusi pantonlar qurulur. Ona görə də buna region dövlətləri tərəfindən xüsusi diqqət yetiriləcək. Eyni zamanda Türkiyə Müdafiə Nazirliyinin və Silahlı Qüvvələrin Başqərargah rəhbərliyinin, eləcə də Azərbaycan Müdafiə Nazirliyinin müşahidəsi altında aparılan bu təlimlər Azərbaycan-Türkiyənin vahid ordusunun formalaşmasına doğru çox ciddi zəmin yaradacaq. Biz bundan sonra da bütün növlər üzrədə təlimlər keçirəcəyik. İran bilməlidir ki, Azərbaycanın Türkiyə və Pakistan kimi hərbi müttəfiqləri var”.
Yunis Abdullayev
