“Azərbaycan Rusiya və Ermənistan rəhbərliyi ilə regional problemlərin nizamlanması istiqamətində konstraktiv müzakirələr aparmağa hazırdır”.

Bu sözləri Ednews-a açıqlamasında politoloq Tofiq Zülfüqarov dekabrın 12-də Rusiya Prezidenti Vladimir Putinin Azərbaycan Prezidenti İlham Əliyev və Ermənistanın Baş naziri Nikol Paşinyan ilə telefon danışığını şərh edərkən bildirib.

Onun sözlərinə görə, dövlət rəhbərləri arasında telefon danışığında Laçın-Şuşa yolunda Azərbaycan etirazçılarının aksiyası ilə yanaşı bəzi önəmli regional məsələlərin də müzakirə olunduğunu ehtimal etmək olar.

“Azərbaycan, Ermənistan və Rusiya arasında üçtərəfli razılaşmalar var. Təəssüf ki, rəsmi İrəvan müxtəlif vasitələrlə bu razılaşmaları öz xeyrinə dəyişməyə çalışır. Burada Ruben Vardanyan faktorunu, eləcə də sülhməramlıların müvəqqəti nəzarəti altında olan ərazilərimizdə Ermənistan hərbiçilərinin qanunsuz fəaliyyətini nəzərə almaq lazımdır. Təbii ki, Azərbaycan dövləti və onun ictimaiyyəti Ermənistanın bu hərəkətlərinə sərt mövqe sərgiləyir, eyni zamanda Rusiyaya öz narazılığını bildirir.  Erməni tərəfinin istifadə elədiyi üslubları biz də tətbiq edəcəyik. Bu baxımdan Azərbaycan, Ermənistan və Rusiya rəhbərləri dünənki telefon danışığında bölgədə mövcud olan siyasi böhranı və digər problemləri müzakirə etməsi ehtimal oluna bilər. Bizim dövlətin siyasi gündəliyində böhranın çıxış yollarının tapılması priotet təşkil edir”.

Politoloq, həmçinin qeyd edib ki, Azərbaycan rəhbərliyi Qarabağ ermənilərinin cəmiyyətimizə reinteqrasiya olunması məsələsinə xüsusi diqqət yetirir.

“Hesab edirəm ki, Azərbaycan həmin bölgədə yaşayan erməni sakinlərinin reinteqrasiya prosesində real və güclü iradə nümayiş etdirmək iqtidarındadır. Bu məsələdə planlarımızı qismən olsa da erməni tərəfinə və rus sülhməramlılarına bildərəcəyik. Erməni separatçıları məqsədyönlü şəkildə çalışırlar ki, təxribatxarakterli qarşıdurmalara yol verməklə bölgədə Azərbaycan və Rusiyanı üz-üzə qoysunlar. Lakin Azərbaycan hər zaman regionda bütün problemlərin dinc yolla həll olunmasına və konstraktiv müzakirələrin aparılmasına hazırdır. Biz razılaşdıralan şərtlərin əməl olunmasını tələb edirik”.

Sonda Tofiq Zülfüqarov vurğulayıb ki, Azərbaycan yalnız sağlam düşüncəli Qarabağ erməniləri ilə təmaslar quracaq.

“Ərazilərimizdə Ruben Vardanyanın erməniləri təxribatlara təhrik etməsi, separatçı rejimin rəhbəri Arayik Arutyunyanın Fransaya səfiri, yəni bu kimi addımlarla qondarma qurumun müstəqil olduğunu görsərtməyə çalışırlar. Azərbaycan bunu qəbul eləmir və qəbul eləmək də niyyətində olmayacaq. Oyuncaq qurumla heç bir təmaslar qurulmayacaq. Yalnız öz siyasi xəttini düzgün müəyyənləşdirən və Azərbaycan vətəndaşlığını qəbul etməyə hazır olan ermənilər ilə lazimi danışıqlar və müzakirələr aparılacaq”.

Yunis Abdullayev