"Xankəndi yolundakı aksiya əladır. Əməlli-başlı səs gətirir. Hər şey də gözəldir. Amma düşünürəm ki, sadəcə o yoldakı aksiya ilə işimiz bitməməlidir. Ermənilər öz yerində, problemlərin əsas səbəbkarı Rusiyaya da yerini göstərmək üçün çox kiçik addımlar atmaq olar”.

Bu sözləri Ednews-a əməkdar jurnalist, hüquq müdafiəçisi Azər Həsrət bildirib. O, qeyd edib ki, örnək üçün, ölkə boyu vətəndaşlarımız nümayişkaranə şəkildə rus soyad sonluqlarından imtinaya başlasınlar.

“Bu 31 illik müstəqillik dönəmində o sonluqlardan hələ də imtina etməməyimiz böyük ayıbdır. Amma yenə də gec deyil. İndi ki, bu vaxta qalıb, belə bir mərhələdə rusa aid hər şeydən imtina edək. Eyni zamanda balalarını rus məktəbində oxudanlar da bir balaca hərəkətə gəlsinlər və milli məktəbləri seçsinlər. Artıq o da təsdiq və sübut olunub ki, rus məktəbləri iddia edildiyi kimi daha yüksək səviyyəli təhsil vermir. Bir də rus dilini öyrənmək üçün uşağı o məktəbə qoyduğunu iddia edənlər, lütfən, bu cəfəng iddialarınızı yığışdırın. Bir dili öyrənmək üçün 11 il o dildə təhsil almağa gərək yoxdur. Milli qeyrətə səsləyirəm hər kəsi! Yeri gəlmişkən, ilk addım olaraq facebook-da soyad sonluqlarını dəyişməklə başlamaq olar”.

A.Həsrətin sözlərinə görə soyad sonluğunu dəyişmək üçün şəxsin özü doğum haqqında şəhadətnaməsi ilə Qeydiyyat idarəsinə yaxınlaşır, burada ərizə yazır.

“Dərhal da o dəyişiklik doğum haqqında şəhadətnaməyə əlavə edilir. Bu iş pulsuzdur. Sonra isə ASAN xidmətə gedib şəxsiyyət vəsiqəsini dəyişmək lazımdır. Yəni bu qədər asandır bu iş..."

Xatırladaq ki, artıq 3-cü gündür ki, Şuşa ərazisində Rusiya sülhməramlılarının nəzarətində olan yolun bir hissəsində azərbaycanlı fəallar və ekologiya üzrə qeyri-hökumət təşkilatlarının (QHT) üzvləri Qarabağ iqtisadi rayonunda ekoloji terrora son qoyulması tələbi ilə etiraz aksiyası davam edir.

Oğuz Ayvaz

• Tag:
• Rus soyadları
• Azərbaycan
• Qarabağ