“Avropa İttifaqı və Fransa Ermənistanda müşahidə missiyası adı altında siyasi və strateji cəhətdən möhkəmlənmək niyyətindədir”.
Bu sözləri Ednews-a açıqlamasında politoloq Məhəmməd Əsədullazadə Ermənistanda Avropa İttifaqının mülki missiyasının yaradılmasının arxasında duran hədəflərdən söhbət açarkən bilidirib.
Onun sözlərinə görə, Brüsselin növbəti dəfə Ermənistana müşahidə missiyası göndərməsi birbaşa Praqada əldə olunan dördtərəfli razılaşmaların pozulması deməkdir.
“Avropa İttifaqının bu məsələ ilə bağlı irrasional qərarı ilk növbədə Azərbaycan və Ermənistan arasında sülh prosesinə zərbə vuracaq. Doğrusunu desək, Brüsselin Ermənistanın Azərbaycanla sərhəd ərazilərində öz müşahidə missiyasını yerləşdirməsi bu ölkədə möhkəmlənmək, xüsusilə Rusiyanın regionda təsir imkanlarını zəiflətməyə yönəlib. Avropa İttifaqı Gürcüstandakı kimi Ermənistanda da öz siyasi, iqtisadi və starteji təsir imkanlarını genişləndirməyə çalışır. Avropa İttifaqının iki illik sülh missiyası bölgədə sülh yaratmaq yox, bilavasitə Ermənistanı qorumağa istiqamətlənib. Amma Gürcüstandan fərqli olaraq, Brüssel Ermənistanda öz istəklərinə və arzularına tam nail ola bilməyəcək. Ona görə ki, regionda qərəzli və məntiqsiz siyasət yürüdürlər. Əgər Avropa İttifaqı Cənubi Qafqaz regionunda öz siyasətini uğurla yönəltmək istəyirsə, mütləq Azərbaycan-Ermənistan münasibətlərinin normallaşmasına təkan verməlidir, o cümlədən Brüssel formatı çərçivəsində sülh təşəbbüslərini davam etdirməlidir. Bu istiqamətdə müsbət nailiyyətlər olduğu təqdirdə Ermənistana müşahidə missiyasının göndərilməsinə ehtiyac olmayacaq”.
Ekspert əlavə edib ki, Aİ-nın müşahidə missiyası Ermənistanı sülh prosesindən yayındırmağa kömək edəcək, bölgədə daha çox yeni problemlərin əmələ gəlməsinə şərait yaradacaq.
Avropa İttifaqının bu qərarında Fransanın rolunun danılmaz olduğunu deyən M.Əsədullazadə vurğulayıb ki, Fransa bununla Ermənistanda öz geostrateji dayağını gücləndirməyi planlaşdırır.
“Fransanın Ermənistandakı siyasəti regionda siyasi böhranı daha da dərinləşdirəcək. Əslinə qalanda Fransanın dövlət rəhbərliyi Cənubi Qafqazda gedən siyasi-hərbi prosesləri düzgün qiymətləndirməyi bacarmırlar. Onların bölgədə atacağı addımlar uğurlu olmayacaq, həqiqəti desək, bütün bunlar Parisin əlehinə işləyəcək. Fransa Cənubi Qafqazda regional sülhün və təhlükəsizliyin bərqərar olunmasına istəyirsə, Azərbaycanla bir çox məsələləri müzakirə etməlidir, danışıqlar çərçivəsində hər iki tərəf arasında sülh müqaviləsinin imzalanması üçün təşəbbüs göstərməlidir. Amma təəssüflər olsun ki, rəsmi Parisin hazırki addımları sülhün təmin olunmasına qarşı yönəlib”.
Qeyd edək ki, Avropa Şurası Ümumi Təhlükəsizlik və Müdafiə Siyasəti çərçivəsində Ermənistanda Avropa İttifaqının mülki missiyasının yaradılması barədə qərar qəbul edib. Bu missiyanın sponsoru və əsas lobbisi Fransadır.
Müşahidə missiyasının ilkin mandatı iki il olacaq və onun əməliyyat qərargahı Ermənistanda yerləşəcək.
Yunis Abdullayev
