Rusiya Qafqazı tərk etmək istəyir. Bundan əlavə o, öz nüfuzlu yerini Türkiyəyə vermək istəyir.
Bu iddia ilə Stenford Universitetinin siyasi elmlər doktoru Artur Xaçikyan deyib. O, bildirib ki, hazırda Rusiyanın başı Ukraynaya qarışdığı üçün Qafqaz ona o qədər də maraqlı deyil.
Bu iddialar nə dərəcədə doğrudur? 18-ci əsrdən əsasən Cənubi Qafqazı əlində bir geosiyası silah kimi saxlayan Rusiya hansı addımları atacaq? zəiflədiyini sübut edəcəkmi?
Britaniyalı politoloq Patrik Volş Ednews-a açıqlamasında bütün bu suallara aydınlıq gətirib.
P.Volş bildirib ki, Rusiyanın dövlət maraqları Qərbin Qafqazda təsirinin milli təhlükəsizliyə təhdid kimi görünməsinin qarşısını almaqdan ibarətdir:
“Çar və Sovet dövründə Rusiya dövlətinin Cənubi Qafqazda hökmranlıq etmək gücü var idi. İndi isə Rusiya həmin gücə malik deyil, ona görə də onun regiondakı ambisiyaları daha da məhduddur. Ukrayna müharibəsi Rusiya tərəfindən qazanılmış, uduzmuş və ya heç-heçə olsa belə, çox güman ki, Rusiyanın gücünün və təsirinin daha da azalmasına gətirib çıxaracaq. Bununla belə, Rusiyanın ehtiyac duyduğu halda hərəkət etmək qabiliyyətini qiymətləndirməmək olmaz. Ukrayna buna bariz nümunədir. Beləliklə, Rusiya öz təhlükəsizlik tələblərini asanlaşdırmaq üçün oradakı hökumətlərdən asılı ola bilsə, Cənubi Qafqazı tərk edəcək. Məhz buna görə də Azərbaycan hökuməti rəsmi Moskva ilə yaxın və qonşuluq münasibətlərini qoruyub saxlamağa diqqət yetirir. İngiltərə İrlandiyadan çıxmağa təşviq edildiyi kimi Rusiya da Cənubi Qafqazı tərk etməyə təşviq edilməlidir.
O, Rusiyanın Ukrayna hadisələrindən dolayı zəifləyəcəyini vurğulayıb:
“Moskva bilirdi ki, hərbi müdaxilə və sonrakı münaqişə onu zəiflədəcək. Rusiya müharibəni minimuma endirmək üçün Kiyevi qorxutmağa çalışdı, lakin Kiyevin müqaviməti və ən əsası Qərbin yardımı ilə bu, uğursuz oldu. Rusiya Ukraynadakı müharibədə qalib gəlsə belə, Donbas və Krımın təhlükəsizliyini təmin etmək üçün böyük miqdarda qan və sərmayə sərf edib və nəticədə çox zəifləyib. Bu, Cənubi Qafqazda yeni reallıq yaradacaq ki, kim ona daha effektiv reaksiya verərsə, o da qazanacaq. Ancaq müharibədən sonrakı Rusiya ilə münasibətdə diqqətli olmaq lazımdır. Hesab edirəm ki, Azərbaycan hökuməti öz rəhbərliyinin fonunda və son bir neçə ildə baş verən hadisələrə görə Ermənistandan qat-qat üstün dövlət gücünə malikdir”.
Ülviyyə Şahin