Xəbər verdiyimiz kimi, Azərbaycan Respublikası Prezidentinin Administrasiyası Qarabağın erməni ictimaiyyətinin nümayəndələrini reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün ikinci görüşə dəvət edir.
Görüşün yaxın günlərdə Bakı şəhərində keçirilməsi təklif olunur.
Məsələ ilə bağlı Ednews-a danışan Beynəlxalq Avrasiya Mətbuat Fondunun Prezidenti Umud Mirzəyev bildirib ki, Azərbaycan 44 günlük Vətən müharibədən dərhal sonra Qarabağ iqtisadi rayonunda yaşayan erməni sakinlərlə görüşmək təşəbbüsləri ilə çıxış edib.
Onun sözlərinə görə ikinci görüşün keçirilməsi probelmin həll olması deməkdir.
“Bu görüşlər münasibətlərin formalaşmasında ciddi bir rol oynaya bilər. Bilirik ki, ilk görüş martın 1-də Xocalıda keçirilib. Hesab edirəm ki, Qarabağda olan Azərbaycan vətəndaşları artıq Bakının yollarını tanımalıdırlar. Bütün konfiliktlər, danışıqlardan, münasibətlərdən, barışdan keçir. Ölkə Prezidenti dəfələrlə yüksək tribunalardan Qarabağda yaşayan Azərbaycan vətəndaşları üçün zəruri şəraitin yaradılacağı mesajları verib. Təhlükəsizlik problemlərinin həll olacağını dilə gətirib”.
U.Mirzəyev həmçinin əlavə edib ki, Azərbaycan insanı hər zaman barış mövqeyi nümayiş etdirib.
“Mövcud konfilikti azərbaycanlılar yaratmayıb. Bunu hər kəs bilir. Bunu orada yaşayan yerli insanlar da bilir.
Rusiyadan, Ermənistandan gələn “saqqallı” separatçlardan sonra regioanda mizan pozuldu. İndi silahların danışan zamanı deyil, biz o mərhələni çoxdan keçmişik. Mən yüz faiz əminəm ki, biz yumşaq güclərin, xal diplomatiyasının, dialoqların aparılması ilə problemlərin həllinə nail ola bilərik. Bu danışıqlar nə qədər sürətli, sıx aparılsa ordakı separatçılar da qalmayacaq, qərar tuta bilməyəcəklər. Bu gün orada müəyyən mesajların verilməsi, Qarabağda yaşayan ermənilərin adından danışılması missiyasını separatçıların əlindən almaq lazımdır”.
Qeyd edək ki, Qarabağın erməni ictimaiyyətinin nümayəndələri ilə ilk görüş martın 1-də Xocalı şəhərində keçirilib. Milli Məclisin deputatı, Azərbaycan Respublikasının Qarabağ bölgəsində yaşayan erməni sakinlər ilə təmaslar üzrə məsul şəxs təyin edilən Ramin Məmmədov Azərbaycan Respublikası ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşübş. Görüş zamanı Azərbaycan Respublikasının Konstitusiyasına və qanunlarına uyğun olaraq Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair ilkin müzakirələr aparılıb.
Oğuz
