Prezident İlham Əliyev mayın 28-də Laçında bu rayondan olan sakinlərlə görüşdə bir müddət əvvəl yolu azaraq Ermənistan ərazisinə keçən və orada işgəncələrə məruz qalan iki hərbçimizdən danışıb. Dövlət başçısı qeyd edib ki,  İkinci Qarabağ müharibəsi başa çatandan sonra Ermənistanla Azərbaycan nümayəndələri belə bir razılığa gəliblər, əgər kimsə yolu azsa, əgər belə bir hal baş verərsə, maksimum iki günə o adamlar qaytarılmalıdır.

 

Məsələ ilə bağlı Ednews-a açıqlamasında hüquq üzrə fəlsəfə doktoru, beynəlxalq hüquq üzrə ekspert Elgün Səfərov söyləyib. 

 

O bildirib ki, videogörüntülərdən də görünüb ki, hərbiçilərimizə şiddət və zorakılıq göstərilir. 

 

“Onlar ağır şəkildə döyülüb və işgəncələrə məruz qalıblar. Bu cür pis rəftar beynəlxalq humanitar hüquqa ziddir, tamamilə qəbuledilməzdir və beynəlxalq səviyyədə qınanılmalıdır. Bu da Cenevrə Konvensiyası, işgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyalar üzrə şərtlərinin pozulmasının göstəricisidir. Digər tərəfdən isə burada status verilmə məsələsi var. Əgər dövlət yolunu azaraq getmiş şəxsi  əsir düşmüş kimi status verirsə Beynəlxalq Qırmızı Xaç Komitəsi (BQXK)  vasitəsi ilə məsələni həll etməlidir. Lakin müharibə dövrü olmadığı üçün həmin hərbçilərə əsir düşmüş demək olmaz. Səhvən sərhədi keçən birinin  məhkəmə qərarı ilə dəyişdirilməsi mümkündür. Dəfələrlə Azərbaycan Respublikasının rəsmi qurumları tərəfindən bildirilib ki, siz bizim əsgərlərimizi qaytarın, qarşılıq olaraq da biz də sizin əsgərlərinizi geri qaytaraq.  BMT-nin İşgəncələrə qarşı Komitəsində bu məsələni qaldırmaq mümkündür”.

 

Ekspert  Hüquqi stustlardan istifadə edərək Beynəlxalq Cinayət Məhkəməsinə eyni zamanda BMT-nin İşgəncələrə qarşı Komitəsinə bir sıra müraciətlər etmək olar. 

 

“Buna baxmayaq Ermənistan Respublikası hüquqi statusları nəzərə almır.  XİN tərəfindən işgəncələrə məruz qalan iki hərbçimizlə bağlı rəsmi şəkildə  bir neçə müraciət olub. Bu gün Azərbaycan bütün işlərində sülhün olması və qorunması üçün addımlar atdığını görürük. Bu gün sülh müqaviləsini bağlamaq istəyən ölkəyə qarşı isə belə səhv addımlar atılır. Ermənistan XİN rəhbəri məntiqə uyğun  olmayan siyasət yeridir. Ya sülhə doğru addım atılmalıdır, ya da Prezidentin dediyi kimi Ermənistan bu razılaşmaları pozursa, bunun acısını  özü çəkəcək. Bu məsələlərdə Ermənistan məsuliyyət daşıyır. Çünki dəfələrlə xəbərdarlıq edilib. Ermənistana çağırış edirik ki, iki nəfər hərbçinin qaytarılmasına və yaxud dəyişdirilməsinə razılaşsın, bu da sülh müqaviləsinə dəstək olacaq”. 

 

Qeyd edək ki, aprel ayında Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülüb. Sosial şəbəkələrdə yayılmış videogörüntülərin birində əsir götürülmüş Axundov Hüseyn Əhliman oğluna qarşı fiziki işgəncə və qeyri-insani rəftar halları əks olunub.

 

Aysel Şahmar