Ermənistan növbəti dəfə Azərbaycana qarşı ekoloji cinayətə əl atmaq niyyətindədir.
Belə ki, Naxçıvan Muxtar Respublikası ilə həmsərhəd bölgədə və Türkiyə ilə sərhədə çox yaxın ərazidə Ermənistanın inşasını nəzərdə tutduğu iri metallurgiya zavodu ətraf-mühitə birbaşa təhdid ola bilər. Zavodun Araz çayının kənarında Arazdəyən kəndində yerləşəcəyi bildirilir. Bu da çayın Ermənistan tərəfindən keçib ölkəmizə tökülən hissəsinin çirklənməsi deməkdir.
“Bu zavodun inşası ətraf-mühitin, ekosistemin geniş miqyasda ziyan görməsinə, havanın zəhərli tullantılarla çirklənməsinə səbəb olacaq. Artıq Naxçıvan əhalisi, Sədərək sakinləri bununla bağlı etirazlarını bildirir”.
Bu fikirləri Ermənistanın növbəti ekoloji terroru barədə danışan deputat Vüqar İskəndorov Ednews-a açıqlamasında bildirib.
Deputat qeyd edib ki, Ermənistan hər zaman olduğu kimi ekoloji terrorla məşğuldur. Oxçuçay və Araz çayının digər ərazilərdən keçən hissələrini tullantılarla çirkləndirib.
Zavod inşa edilsə, oradan xaric olunan zəhərli qazlar, kimyəvi maddələr və digər tullantılar birbaşa çaya axıdılacaq. Bu, Ermənistanın növbəti ekoloji cinayətidir.
“Ermənistan dəfələrlə törətdiyi beynəlxalq cinayətlərilə bütün dünyada məşhurdur. Ermənistanın ekoloji cinayətləri tək havanın və suyun çirklənməsilə nəticələnməyib, eyni zamanda Azərbaycanın meşə fondunun əhəmiyyətli hissəsi məhv edilib, 100 illərlə yaşı olan ağaclar qırılıb, bitki örtüyünü dağıdılıb. Metallurgiya zavodunun inşası bu silsilə cinayətin davamıdır. Araz çayının axdığı Azərbaycan ərazilərində yaşayan əhalinin sağlamlığı təhlükədədir”.
V.İskəndərov onu da əlavə edib ki, həm Azərbaycan, həm Ermənistan “Transsərhəd kontekstində ətraf mühitə təsirin qiymətləndirilməsi haqqında” Konvensiyanın tərəfləridir. Həmin Konvensiyanın tələbinə görə, bir ölkənin öz ərazisində planlaşdırdığı iri təsərrüfat fəaliyyəti digər ölkələrin ərazisinə mənfi ekoloji təsir göstərərsə, bu fəaliyyət həmin ölkələrin müvafiq qurumları ilə razılaşdırılmalıdır.
“Yəni, Ermənistan sərhəddə belə bir zavod inşa etmək istəyirsə, mütləq məsələni Azərbaycanla razılaşdırmalıdır. Azərbaycan tərəfindən müvafiq qurumlar, ekspertlər əraziyə baxmalı, zavodun hansı məqsədlə inşa edilməsi, nə ilə çalışacağı öyrənilməli, qiymətləndirmə aparılmalı, yalnız bundan sonra Konvensiyanın şərtlərini uyğun müvafiq rəy verilməlidir. Bu rəyə əsasən zavodun inşa edilib, edilməməsi qərarlaşdırılmalıdır. İnsanlığa qarşı dəfələrlə cinayət törətmiş bir ölkənin həyata keçirmək istədiyi ekoloji terrora son qoymaq üçün beynəlxalq ictimaiyyət hərəkətə keçməlidir”.
Törə Zeynal
.jpg)
