Xəbər verdiyimiz kimi, Qarabağın Rusiya hərbi kontingentinin müvəqqəti təsir dairəsində növbəti dəfə atəş səsləri eşidilib. Rusiya sülhməramlıları tərəfindən atəşkəs rejiminin pozulması qeydə alınıb. Ağdərə istiqamətində Qarabağdakı qanunsuz erməni hərbi birləşmələrinin bir əsgəri yaralanıb.

Baş verən təxribatlar haqda Ednews-a şərh bildirən Sosial Tədqiqatlar Mərkəzinin sektor müdiri, politoloq Tural İsmayılovun sözlərinə görə, bu mənzərəni yaradan tərəf Ermənistandır və düşmən ölkə bölgədə sülhə əngəl törətməklə Cənubi Qafqazda münaqişə ocağını daha da alovlandırmaqda maraqlıdır. Eyni zamanda, Ermənistanın fərqli mövqe sərgiləməsi də münaqişənin həllinə mane olur. Düşmən ölkə Qərbə meyl etdikcə, bölgədə siyasi balans pozulur.

T. İsmayılov onu da qeyd edib ki, Ermənistanın regionda qarışıqlıq yaratmaq cəhdləri, həmçinin Rusiya əleyhinə həyata keçirilən kampaniyaları bütün dünyada diqqətlə izlənilir:

“Ermənistanın öz müttəfiqi əleyhinə addımlarına qarşı Rusiyanın təsir imkanları kifayət qədər genişdir. Rusiyanın erməni miqrantları ölkədən qovmaq kimi təsir imkanları var. Rusiya prezidentinin mətbuat katibi Dmitri Peskov da əslində miqrantlarla bağlı Ermənistana mesaj verdi. Bu onu göstərir ki, Rusiya Ermənistandan olan miqrantları hər an qova bilər”.
Politoloq istisna etmir ki, Ermənistanı qızışdıran xarici güclər var: 

“Həmin güclər regionda sülhün, sabitliyin olmasını istəmirlər. Buna görə də Ermənistan üzərindən öz maraqlarını təmin etməyə çalışırlar. Ermənistan hazırda sülhdən çox uzaqdır. Xarici ölkələrin maraqları naminə müharibəni gözə alan bir ölkə ilə necə sülh imzalamaq olar? Bundan başqa, rəsmi İrəvan mövcud reallıqların onun əleyhinə olduğunu yaxşı bilir. Buna görə də prosesləri süni şəkildə dəyişdirməyə çalışır. Nəzərə alsaq ki, sərhədlərin delimitasiya və demarkasiyası həyata keçirilmir, yekun sülh müqaviləsi imzalanmır, onda demək olar ki, geriyə bir variant qalır. Rəsmi İrəvan vəziyyəti gərginləşdirəcəyi təqdirdə Bakı buna misli ilə cavab verəcək. Yəni baş verə biləcək bütün hadisələrin məsuliyyətini Ermənistan tərəfi daşıyır”. 

T.İsmayılov qeyd etdi ki, bütün bunların da ən böyük günahkarı birmənalı şəkildə hazırkı Ermənistan hakimiyyətidir. Belə olduqda gərginlik hər an aktiv fazaya keçə bilər: 

“Ermənistan hər bir fürsətdən istifadə edərək Azərbaycanın ərazi bütövlüyünü təhdid etməyə davam edir. Hesab edirəm ki, buna görə də Ermənistan ciddi şəkildə bölgədə gərginləşdirici faktor kimi xarici güc mərkəzlərinin oyuncağı rolunu davam etdirir. Belə olduğu təqdirdə, həm sərhədlərin delimitasiya demarkasiyası, həm Azərbaycanla Ermənistan arasında yekun sülh müqaviləsi ilə bağlı təəssüflər olsun ki, yetkin bir addım atıla bilmir. Bütün bunların da ən böyük günahkarı birmənalı şəkildə hazırkı Ermənistan hakimiyyətidir. Belə olduqda gərginlik hər an aktiv fazaya keçə bilər. Bu baxımdan da vəziyyət getdikcə daha da pisləşir və Azərbaycan öz təhlükəsizliyi naminə Ermənistanı növbəti dəfə cəzalandırmaq hüququnu özündə saxlayır”.

Oğuz