ABŞ Dövlət Departamenti bildirib ki, Vaşinqton “Azərbaycanın Qarabağ erməniləri qarşısında öhdəliklərini yerinə yetirməsinə nəzarət etməli olan beynəlxalq missiya” yaratmaq üzərində işləyir. Prezident Co Bayden isə Ermənistan baş nazirinə məktubunda “Qarabağda ölən ermənilər”ə (əslində separatçılara) “yas” tutduqlarını yazır, üstəgəl, yüksək vəzifəli ABŞ rəsmiləri İrəvana gəlir və sair.
ABŞ-la Ermənistan arasındakı bu yaxınlaşmanı necə şərh etmək olar?
Bu barədə politoloq Cümşüd Nuriyev Ednews-a açıqlamasında ABŞ-ın özünü demokratik ölkə saymağına baxmayaraq Azərbaycanın daxili işinə qarışdığını bildirib.
“Ermənistanla nə işləri varsa, görsünlər, özləri bilər, amma Qarabağ onlar üçün alət ola bilməz:
İkincisi, Baydenin 80 yaşı var, onun siyasi iradəsi yoxdur, nə deyirlərsə, onu təkrarlayır. Bayden niyə yas saxlamalıdır? Qarabağda mülki ermənilər yox, terrorçular zərərsizləşdirilib. Zərərsizləşdirilənlər arasında Ermənistanla yanaşı, Suriya, Rusiya, Livan və İraqdan gəlmiş erməni mənşəli terrorçular da var. Onların arasında farslar da, təəssüf ki, ərəblər də yer alır”.
Politoloq qeyd etdi ki, Azərbaycan ermənilərə qarşı deyil, terrorçulara qarşıdır:
“Biz terrorçulara qarşı mübarizə aparırıq. Düz də edirik. Beynəlxalq hüquq normaları və BMT Nizamnaməsi, eləcə də Azərbaycan qanunvericiliyi bunun əleyhinə deyil. Yəni Azərbaycanın bu addımı atması üçün bütün hüquqi şərtlər yetişmişdi.
Amerikanın 4 ştatı ayrılmaq, müstəqil dövlət olmaq istəyir. Əgər ABŞ demokratik dövlətdirsə, gedib, bunu tanısın. Amma gəlib Qafqazda “demokratiya” sınaqdan keçirirlər. Paşinyanla nə azarları varsa, görsünlər. ABŞ-a - özünü “dünyanın demokratiya beşiyi” adlandıran bir dövlətə yaraşmır ki, 10 milyonluq bir xalqa qarşı belə ədalətsiz olsun. Belə yanaşma ABŞ-a başucalığı gətirməyəcək. Erməni lobbisinin əlində bu qədər alət olmaq Amerikanın sonunun başlanğıcıdır”.
Oğuz