Xəbər verdiyimiz kimi, millət vəkili Fazil Mustafa çıxışında bildirib ki, qalib ölkə kimi matəm günləri təqvimdən çıxarılmalıdır. Bu fikirlər sosial şəbəkələrdə birmənalı qarşılanmayıb.
Ümumiyyətlə, qalib ölkə Azərbaycanın təqvimindən matəm günləri çıxarılamlıdırmı?
Ednews bu barədə ictimai-siyasi şəxlər arasında sorğu keçirib. Sorğunun nəticələrini təqdim edirik:
Deputat Arzu Nağıyev:
“Azərbaycanda matəm günlərinin təqvimdən çıxarılması o demək deyil ki, bu xalq unutqandır. Təbii ki, həmin vaxtlarda işğal olunmuş rayonlarda hər bir vətəndaşın, ya sakinin bir qohumu şəhid olub və matəm günündə bütün dünyada olduğu kimi adamlar öz yaxınlarının qəbrini və yaxud tikilmiş abidələrini ziyarət edirlər. Qələbədən sonra artıq dövlət səviyyəsində rayonların alınmasının da il dönümlərinin qeyd edilməsi bizim yaddaşımızdır.
Nə qədər qələbə günlərimizin sayı çox olsa, daha böyük ruh yüksəklikləri olar. Dünya müharibəsi vaxtı da şəhərlər işğal olunanda alman faşistləri tərəfindən həmin günlərin anım günləri qələbəyə qədər olardı, qələbədən sonra belə məsələ yox idi”.
Müasir Müsavat partiyasının sədri Hafiz Hacıyev:
“Düzgün fikir deyil. Haranın qalibi olmuşuq ki? Öz torpaqlarımızı işğalçı terrorçulardan azad etmişik. Nə qədər şəhid vermişik. Bu nə deməkdir? Nəyə görə matəm günləri təqvimdən çıxarılmalıdır? Fazil Mustafa bu fikirləri ilə nə demək istəyir? Azərbaycan xalqının milli-mentalitetinin əksinə getməliyik? Görünür, Fazil Mustafanın yeri rahatdır, saytlarda yazılanlardan xəbəri yoxdur. Populist çıxışlar edərək gündəmdə qalmaq istəyir. Bunlara ehtiyac yoxdur”.
Millət vəkili Müşfiq Məmmədli:
“Hər kəs mövqeyini ictimai, siyasi hadisələrə bildirməlidir. İstənilən günlərin təyini, müəyyən qərarların verilməsi ilə bağlı ictimasi-siyasi proseslər, xalqın tarixində hansı rol oynamasından asılı olaraq müəyyənləşir. Fikirləşirəm ki, hər bir halda bütün hadisələr bizim tariximizdir. İstər qələbələr, istərsə də digər tarixlər olsun. Matəm günləri də tarixdir, biz bunları yaşamışıq. Mənə elə gəlir ki, tarix necə var elə də qalmalıdır”.
AĞ partiya sədri Tural Abbaslı:
“Bir çox xalqların tarixində ağır günlər var. Amma millətləri matəm günləri ilə yaşatmaq onların özgüvənini sarsıdır, qırır. Matəm günlərinin səbəbi olmuş hadisələri unutmamaq üçün tarix kitablarında, dərsliklərində qeyd olunmalıdır. Xüsusi günləri, məsələn, qələbə, uğurlu, bayram günlərimiz matəm günlərindən çox olmalıdır. Bir milləti yasa, matəmə öyrəşdirmək o qədər də müsbət hal deyil. Bir millət qələbəyə, sevincə, uğura öyrəşməlidir”.
Politoloq Elçin Mirzəbəyli:
“Azərbaycanda yalnız 1 matəm günü var - 20 yanvar. Bu tarix Azərbaycan xalqının müstəqillik uğrunda mübarizəsini simvolizə edən gündür. 27 sentyabr isə Anım Günüdür, matəm günü deyil. Azərbaycanın ərazi bütövlüyü uğrunda canını fəda edən qəhrəmanları anmaq bizim vəfa borcumuzdur. Bizim qalıb ölkə olmağımız onların qəhrəmanlığı sayəsində mümkün olub. Ona görə də təqvimdən heç nə çıxarmaq lazım deyil”.
Politoloq Tural Əliyev:
“Düşünürəm ki, bu düzgün yanaşma deyil. Tarixin qan yaddaşı var. Azərbaycanın elə ağır günləri olub ki, onları unutmaq olmaz. Gələcək nəsillərə də bunu ötürməliyik. Bu baxımdan qalib ölkə kimi qələbə günləri deyil, anım günləri də keçirilməlidir. Çünki orada faciə nəticəsində həlak olanlar da bizim soydaşlarımızdır. Matəm günləri heç vaxt unudulmamlıdır”.
Gələcək Azərbaycan Partiyasının (GAP) sədri Ağasif Şakiroğlu:
"Fazil Mustafanın fikirlərinə qatılıram. Hesab edirəm ki, yerində səsləndirilmiş fikirdir. Düşünürəm ki, təqvimdə 20 yanvar günü də matəm günü statusundan çıxarılmalı və Milli Qürur günü olaraq təqvimə salınmalıdır".
Oğuz
