Xəbər verdiyimiz kimi, Azərbaycan Respublikasının prezidenti İlham Əliyev ötən gün, fevral ayının 7-də növbədənkənar prezident seçkiləri ilə bağlı sərəncam qəbul etdi.
Bəs, partiya sədrlərinin məsələyə münasibəti necədir və kimlər namizəd olacaq?
Ednews bu barədə partiya sədrləri arasında sorğu keçirib:
“Müsavat” partiyasının sədri Arif Hacılı:
“Prezident seçkiləri gözlənilməz olaraq elan edildi, əslində növbədənkənar seçkilərin keçirilməsi üçün hər hansı bir siyasi böhran şəraiti mövcud deyil. Çox güman ki, yaxın günlərdə nə üçün bu qərar alınacağı ilə bağlı cəmiyyətə rəsmi açıqlama veriləcək. Müsavat Partiyasının bu seçkilərdə iştirakı və namizədin kim olacağı ilə barədə məsələlər bugündən etibarən partiyanın kollegial qurumlarında (idarə heyəti) müzakirə olunacaq. Qəbul etdiyimiz qərarlar yaxın günlərdə ictimaiyyətə açıqlanacaq.
Ümid Partiyasının sədri İqbal Ağazadə mətbuata açıqlamasında bildirib ki, açıq etiraf edək ki, xüsusilə Qarabağ qələbəsindən qısa müddət sonra Prezident İlham Əliyevə rəqib olmaq elə də asan deyil.
Eyni zamanda, Ümid Partiyasının bu gün keçirilən iclasında, növbədənkənar seçkidə iştirak etmək məsələsi ilə bağlı müxtəlif rəylər olduğundan qərar partiyanın yerli təşkilatları ilə müzakirələrdən sonra veriləcək”.
Respublikaçı Alternativ Partiyasının icra katibi Natiq Cəfərli:
“Doğrusu, qərarın verilməsi sürpriz deyildi. Çünki növbəti il bir neçə prosesinin olmasını gözləyirdik. Əsasən referendum gözlənilirdi, lakin hər bir halda REAL partiyası istənilən formada seçkilərdə iştirakın tərəfdarıdır. Seçkilərin boykot edilməsi də effektsiz və doğru olmazdı. İştirakın hansı formada olacağını isə sabah idarət heyəti ilə keçirəcəyimiz iclasdan sonra yekun qərarımızı açıqlayacağıq”.
Ağ Partiyanın sədri Tural Abbaslı:
“Dünən bununla bağlı növbədənkənar bir iclas keçirtdik. Qərara alındı ki, rayon təşkilatlarının və sədrlərinin fikirləri alınsın, yekun qərar elə verilsin. İstənilən halda seçkilərə hazır olsaqda qərar çox anidən oldu. Xatırladım ki, prezident seçkiləri olduqca ağır bir prosesdir. Burada 40 mindən artıq imzanın toplanması, 6 minə yaxın seçki məntəqələrinə müşahidəçi təyinatı var və bununla da olduqca geniş bir prosedurdur. Önümüzdəki yaxın günlərdə rayon təşkilatları və digər strukturların iştirakı ilə qərarımız veriləcək”.
Əkbər Novruz
