“Sülh sazişinin imzalanmasına ümidin yarandığı bir vaxtda bu cür fikirlərin səsləndirilməsi öz xalqına sui – qəsd cəhdidir”.
Bu sözləri Ednews-a açıqlamasında Beynəlxalq Avrasiya Mətbuat Fondunun prezidenti Umud Mirzəyev erməni arxiyepiskopunun revanşist açıqlamasına fikir bildirərək səsləndirib.
“Xatırlatmaq yerinə düşər ki, erməni xalqını yeni müharibələrə və faciələrə sövq edən bütün bu dəhşətli ifadələr məhz Bakı ilə İrəvan arasında sülh sazişinin imzalanmasına ümidin yarandığı bir vaxtda səslənir.
Xatırladım ki, Ermənilər 1980-ci illərin sonlarında Azərbaycanda separatçı qüvvələr formalaşdırmağa başladılar. Məhz onların "miatsum" ideyaları, Qarabağ ətrafında baş verən hadisələr, Qərbi Azərbaycandan soydaşlarımızın deportasiyası, onların bugünki faciəsinin nəticəsidir. Arxiyepiskop Qalstanyan da bu çağırışı ilə bir daha öz revanşizmini etiraf edib. Azərbaycan və Ermənistan hərbçilərinin mübadiləsindən bir neçə gün sonra da öz tərəfdaşlarını eyni addımı atmağa çağırıb. Bu qəbul edilməz bir hadisədir, sadə erməni xalqına bir sui – qəsd cəhdidir. Bu həm də onun göstərgəsidir ki, Ermənistanda revanşist, seperatçı, öz mənafeylərini düşünən, cəfəngiyyatla dolu insanlar ali səviyyədə hələ də mövcuddur.Təəssüf ki, erməni revanşistləri hələ də tarixdən dərs götürmür və fərqində deyillər ki, bu cür çağırışlar daha çox itkilərə məruz qalmalarına səbəb ola bilər”.
Umud Mirzəyev birgə yaşayış barədə də fikirlərini bölüşüb. O, sülh yolunda Azərbaycan tərəfinin etdiyi bütün müsbət səylərdən də söz açıb.
“Ermənistanın azərbaycanlılara qarşı etnik təmizləmə aparması və torpaqlarımızı 30 ildən artıq işğal etməsinə baxmayaraq, Azərbaycan xalqı hər zaman sülh tərəfdarı olub. Biz hər zaman barış, əmin-amanlıq formalaşdırmağa çalışmışıq. Ona görə ATƏT-in Minsk qrupunun fəaliyyətsizliyinə dözmüşük. Hər zaman iki ölkə arasında sülh və əmin – amanlığın yaradılması naminə, istər xalq səviyyəsində, istərsə də dövlətin ali səviyyəsində siyasətimizi buna yönəltmişik. Azərbaycan Respublikasının Ali Baş Komandanı İlham Əliyevin bir mənalı şəkildə məqsədi iki ölkənin vətəndaşlarının sülh şəraitində yaşamasıdır. Həmçinin Azərbaycan Respublikası Prezidentinin köməkçisi Hikmət Hacıyevin ötən gün BBC - ə müsahibəsində səsləndirdiyi “Ermənistan və Azərbaycan bir araya gələrək sülh bağlamalıdır” ifadəsi də bunun bariz nümunəsidir”.
Xatırladaq ki, Erməni Apostol kilsəsinin Tavuş yeparxiyasının rəhbəri Baqrat Qalstanyan xütbəsində nifrət dolu çağırış edib. O, erməniləri Azərbaycanla müharibəyə səsləyərək özünü revanşist adlandırıb.
Əkbər
