Xəbər verdiyimiz kimi, Yeni Azərbaycan Partiyasının fevralın 7-də keçiriləcək növbədənkənar prezident seçkilərində namizədi İlham Əliyev olacaq. Bəs müxalif düşərgədə seçkiyə hazırlıq hansı səviyyədədir? Keçiriləcək seçkilərdə YAP-ın namizədi ilə kimlər mübarizə aparacaqlar?
Ednews bu barədə siyasi partiyalar arasında sorğu keçirib.
Milli Dirçəliş Hərəkatı Partiyasının sədri Fərəc Quliyev:
“Ümumiyyətlə yanaşmamız budur ki, bir partiya mövcuddursa bütün seçkilərdə iştirak etməlidir. Çünki partiya öz düşüncəsini hakimiyyətə daşımaq, hakimiyyətə gəlmək istəyirsə, bunun yolu seçkidir. Seçkiyə qatılmamaq partiyanın fəaliyyətində suallar doğurar. Ona görə də MDHP indiyə qədər bələdiyyə, parlament, prezident seçkilərində iştirak edib. Lakin indi növbədənkənar seçki olduğu üçün hazırlığımız çox məhduddur. Biz əvvəlki seçkilərdə xeyli vaxt qalmış hazırlaşırdıq. Materialları, nümayəndələri, məntəqələri, müşahidəçiləri hazırlayırdıq və bununla əlaqəli digər işləri görürdük. Amma indi bir az seytnot vəziyyətidir. Seçkilərdə iştirak etməyi çox istəyərdik. Çünki səbəb və nəticə hər nə olursa-olsun, seçkidə partiya ən azından yaxşı təbliğat qurur, öz təşkilatının gücünü yoxlayır, ideya, fikirlərini təbliğ edə bilir. Hətta müvafiq uyğun vəziyyət yaranarsa, digər namizədlərlə birlikdə ortaq davranış nümayiş etdirib qalib gəlmək imkanını da əldə edir. Amma indi növbədənkənar seçkilərdə vaxt məhdudiyyəti mövcuddur. Buna baxmayaq, partiyamız özünün qanunvericilik orqanında bu məsələni müzakirə edəcək. Qəbul edilən qərara müvafiq olaraq davranacağıq. İmkanlarımız olsa, çatdıra bilsək, seçkilərdə iştirak edəcəyik. Bütün partiyaların seçkilərdə iştirak etməsini həm cəmiyyət, həm də partiya üçün faydalı olduğunu düşünürəm”.
Müasir Müsavat partiyasının sədri Hafiz Hacıyev:
“Partiyamızın İdarə heyətinin qərarı var. Müasir Müsavat partiyası prezident seçiklərinə hazır vəziyyətdədir. Artıq dairə seçki komissiyalarına da namizədlərimizi vermişik. Özümüzün müşahidəçi qismində olan insanların adlarını, soyadlarını Mərkəzi Seçki komissyasına. Partiyamız dövlətçilik mövqeyindədir. Dövlətimizin qorunub saxlanması, onun gələcəyi üçün atılan addımlarda həmişə dövlətin yanındadır. Ona görə də partiyamızın ruh yüksəkliyində seçkilərə qatılması rayon təşkilatlarından da konfranslar keçirtmişik. Müşavirələrimiz olub. Göstərişimiz də bu olub ki, dövlətçiliyə həmişə sadiq olsunlar. Hər halda partiyamızın məqsədi Azərbaycan xalqına o cümlədən dünyaya bəllidir ki, dövlətin və dövlətçiliyin apardığı daxili və xarici siyasətdə ədalətli qərarların verilməsində yanındadır. Bu səpkidə də işlərimizi davam etdiririk”.
Azad Vətən Partiyasının sədri Akif Nağı:
“Partiyamızın Siyasi Şurasının qərarı ilə seçkilərdə İlham Əliyevin namizədliyini dəstəklədik. Təşviqat prosesində qərarımıza uyğun olaraq İlham Əliyevin mövqeyini müdafə edir, müxtəlif səviyyələrdə , o cümlədən KİV-lərdə bu yöndə təbliğat-təşviqat işləri aparırıq. Partiyamızın adından Dairə Seçki Komissiyalarına müşahidəçilərimizi təqdim etmişik. Naxçıvan , Ağdam , İmişli , Cəlilabad , Sumqayıt , Mingəçevir , Şəki , Şuşa-Ağdam-Xocalı- Xocavənd , həmçinin Bakının rayonlarında və digər seçki ərazilərində müşahidəçi qismində iş aparacağıq. İstənilən seçki ölkənin həyatında ciddi hadisədir , eyni zamanda vətəndaş cəmiyyətinin , siyasi sistemin inkişafına təsir edən prosesdir. Hər bir partiya bunu nəzərə almalı və öz işini namizəd irəli sürməklə bitmiş hesab etməməli , ümumi sağlam partiyalaşma prosesinə töhvəsini verməlidir”.
AĞ partiya sədri Tural Abbaslı:
“Biz prezident seçkilərinə hazırlaşmırıq. Çünki prezident seçkilərində iştirak etmirik. Yəni öz namizədimizlə iştirak etmirik. Bu baxımdan xüsusi hazırlığımız yoxdur. Partiya üzvlərinin də seçkilərdə öz istədikləri namizdə səs verməkdə sərbəstdirlər. Bu məsələdə xüsusi göstəriş də yoxdur. Amma bəzi dairələrdə həm təcrübə baxımdan, yəni partiya üzvlərinin siyasi prosesləri öyrənmək, təcrübə yığması baxımdan, həm də ümumi bir məlumatlılıq yönündə bəzi məntəqələrdə və dairələrdə müşahidə aparmaq fikrimiz var. Uzaqbaşı müşahidənin təşkili ilə bağlı bəzi addımlar atılır”.
Oğuz