Rusiya Qarabağ ermənilərinin arzu etdikləri təqdirdə onların bölgəyə təhlükəsiz qayıtmasına şərait yaratmağa hazır olduğunu bildirib.
Bu barədə Rusiya xarici işlər nazirinin müavini Mixail Qaluzin açıqlamasında deyib.
Maraqlıdır rəsmi Kremlin bunda məqsədi nədir? 2025-ci ildə çıxmalı olan sülhməramlıların bölgədə qalmasını təmin etmək, yoxsa yenidən separatizmi alovlandırmaq?
Mövzu ilə bağlı Ednews-a açıqlamasında siyasi elmlər doktoru, professor Sabir Məmmədli bildirdi ki, bu cür məsələlər birbaşa təxribat xarakteri daşıyır.
Onun sözlərinə görə, artıq Qarabağ probleminin həll olunduğu dövrdən və faktiki olaraq Rusiya sülhməramlıları üçün hər hansı bir funksiyanı yerinə yetirməsinə ehtiyac qalmadığı vaxtda Rusiya XİN müvavini məlum açıqlamanı verib.
“Eyni zamanda nəzərə almaq lazımdır ki, həmin gün Ermənistanda Rusiyanın səfiri də eyni məzmunlu açıqlama verdi ki, Rusiya sülhməramlıları adı ilə rus hərbiçiləri Qarabağ ermənilərinin qayıtmasına şərait yarada bilərlər. Əslində bu məsələdə müəyyən mənada təhlükəli davranış sərgiləndi. Rusiya açıq şəkildə Azərbaycana qarşı diplomatik təzyiq göstərir. Sözsüz ki, Rusiya həmişə çalışıb ki, müxtəlif vasitələrlə ziddiyətlər yaratsın. Rusiya Qarabağda, Cənubi Qafqazda mövcudluğu davam etdirmək istəyir. Bunun üçün də həmişə Qarabağdan istifadə etməyə çalışır”.
S.Məmmədli söhbət əsnasında qeyd etdi ki, unutmamalıyıq: Birinci Qarabağ müharibəsindən sonra rus hərbiçiləri Qarabağdan çıxmış erməniləri İrəvandan Xankəndinə köçürtdülər:
“Azərbaycana qarşı şantaj, nifrət yürütdülər. Beləcə bu proses indinin özündə də davam etməkdədir. Nəzərə almaq lazımdır ki, rus hərbiçiləri canfəşanlıqla, inadkarlıqla bu işlə məşğul olanda heç Azərbaycan ictimaiyyətini, rəhbərliyinin sülh mövqeyini də nəzərə almadılar. Bu mənada Rusiya həqiqətən də kobud davranış sərgiləyir və qarşı tərəfin fikirlərinə məhəl qoymur. Bunun da davamı olaraq indiki açıqlamalar onu göstərir ki, rus hərbiçiləri və Kremlin rəhbərliyi birbaşa olaraq bütün vasitələrlə çalışacaqlar ki, İrəvandan Xankəndinə erməni əhalisini köçürtsünlər. Burada da məqsəd özlərinə fundament yaratmaqdır. Ermənistanın daxili vəziyyəti o qədər də sabit deyil”.
Oğuz