Azərbaycan KİV-də ölkədə referendumun keçiriləcəyi barədə bir sıra xəbərlər yayılıb. Belə ki, baş tutacaq referendumun Naxçıvanın statusu, Nazirlər Kabinetinin taleyi və proporsional seçki sisteminin tətbiqi barədə olacağı iddia olunur. 

Bəs bu iddia nə qədər doğrudur, hazırda belə bir müzakirə varmı?

Ednews məsələ ilə bağlı Milli Məclis deputatları arasında sorğu keçirib:

Deputat Elman Nəsirov:

“Əvvəla, onu qeyd edim ki, belə informasiyalara, xəbərlərə son müddət ərzində biz tez-tez rast gəlirik. Sosial şəbəkələrdə, ayrı-ayrı saytlarda bu məsələlərin müzakirə edildiyini görürük. Həm referendumla bağlı informasiyalar, həm də parlament seçkiləri ilə bağlı informasiyalar yayılır. Bizə də tez-tez bununla bağlı müraciətlər gəlir. Haqqında bəhs olunan məsələ ilə bağlı Yeni Azərbaycan Partiyasının rəhbər qurumlarından Yeni Azərbaycan Partiyasinin Təftiş Komissiyasi komitəsinin üzvü olaraq, heç bir müzakirə olmayıb. Hərçənd olsa idi, mən bu müzakirələrdə iştirak edərdim. Haqqında bəhs etdiyiniz məsələ birbaşa cənab Prezidentin səlahiyyətində olan məsələlərdir və cənab Prezident də bu məsələlərlə bağlı mövqe bildirməyib deyə, hesab edirəm ki, hələ ki bütün bunlar, səslənən fikirlər daha çox – versiyalara, fərziyyələrə söykənir. Konkretlik isə burda yoxdur. Ona görə də hesab edirəm ki, hal-hazırda bu məsələlər, görünür, cəmiyyəti düşündürən məsələlərdir. Ona görə də geniş müzakirə edilir və versiyalar, fərziyyələr irəli sürülür. Amma onların nə dərəcədə reallaşma əmsalının hansı səviyyədə olması ilə bağlı əlimizdə dəqiq dəlil, sübut yoxdur”.

Deputat Azər Badamov:

“Azərbaycanda referendumun keçiriləcəyi ilə bağlı səslənilən fikirlər sadəcə söz-söhbətdən başqa bir şey olmadığını hesab edirəm. Əgər referendumun keçirilməsi ilə bağlı bir qərar qəbul olunarsa, bu ancaq dövlət başçımızın sərəncamı ilə baş verə bilər. Dövlət başçımız sərəncam imzalayandan sonra referendumun keçiriləcəyi ilə bağlı hamı məlumatlı olacaq. O cümlədən referendumla konstitusiyada hansı məsələlərdə dəyişikliklərin təklif olunacağını da ancaq onda bilərik. Ortada bir şey yoxdursa nə deyə bilərik? Boş-boşuna falçılıq etməyi düzgün hesab etmirəm”.

Əkbər Novruz