Erməni mətbuatının yazdığına görə, Ukrayna Prezidenti Volodimir Zelenski yaxın vaxtlarda Ermənistana səfər edəcək. "Azadlıq" radiosunun erməni bürosu səfərin martın 4-də baş tutacağını bildirib. Ukraynanın Ermənistandakı diplomatı Valeri Lobax məlumatı nə təsdiq, nə də təkzib edib. Bu səbəbdən səfərin hələlik rəsmiliyi ilə bağlı məlumat yoxdur, lakin Ermənistan tərəfi bu ehtimala açıq olduqlarını söyləyiblər. Qeyd etmək yerinə düşər ki, Ukraynaya qarşı Rusiya tərəfdən mübarizə aparan ermənilərin olduğu faktı bir çoxlarına məlumdur.
Belə bir fonda Zelenskinin səfəri hansı məqsədi güdür?
Məsələ ilə bağlı ukraynalı analitik Vadim Tryuxan, Ednews - a açıqlamasında bu səfərin baş vermə ehtimalını aşağı qiymətləndirib:
“Düşünürəm, bu səfər baş tutmayacaq, iki həftə əvvəldən elan olunsa belə. Bu hekayə mənə Zelenskinin oktyabrda İsrailə uğursuz səfəri ilə bağlı vəziyyəti xatırladır. Mətbuatda onun ora uçacağı elan edilən kimi dərhal səfərin olmayacağını inkar etməyə başladı. Obyektiv olaraq desək, ən azı hazırda Zelenskinin Ermənistana uçmaq üçün ciddi səbəbini görmürəm. Bəli, bizim həm Ermənistanla, həm də Azərbaycanla yaxşı münasibətlərimiz var, amma nə Ermənistan, nə də Azərbaycan Ukraynaya silah – sursatla təmin etmir. Ukrayna üçün indi bir nömrəli prioritet ABŞ, Avropa Birliyi və ya üçüncü ölkələrdən asılı olmayaraq xaricdən silah tədarüküdür”.
Əlavə olaraq qeyd edək ki, parlamentdə müxalifətdən olan Ermənistan fraksiyasının deputatı Areqnaz Manukyan isə bu səfərdən narahatlığını bildirib. O bu görüşü “xarici qüvvələr”in təşkil etdiyini söyləyib:
“Ukrayna Prezidenti Volodimir Zelenskinin Ermənistana mümkün səfəri Yerevanla Moskva arasında münasibətlərdə dönüş nöqtəsinə çevriləcək. Xarici qüvvələr Rusiyaya qarşı ikinci cəbhə açmaq üçün Zelenskinin Ermənistana səfərini təşkil etmək niyyətindədir. Bu səfər baş tutsa, Ermənistanla Rusiya arasında münasibətlərdə dönüş nöqtəsinə çevriləcək. Azərbaycan bundan mütləq istifadə edəcək və Ermənistana hücum edəcək”, – deyə o qeyd edib.
Areqnaz Manukyan əlavə edib ki, Baş nazir Nikol Paşinyan “erməni Zelenski və ya Saakaşvili” olmaq niyyətindədir.
Əkbər Novruz
