Avropa İttifaqı (Aİ) Şurasının Siyasi və Təhlükəsizlik Komitəsinin üzvləri Ermənistana səfər edəcək. Bildirilib ki, səfərin məqsədi regionda baş verən proseslər və Ermənistan-Azərbaycan sülh prosesi haqqında təsəvvür əldə etməkdir.
Aİ-nin Cənubi Qafqazda nə kimi missiyası ola bilər?
Mövzu ilə bağlı Ednews-a danışan ABŞ-ın Azərbaycandakı keçmiş səfiri Metyu Brayza bildirib ki, Almaniyanın sülhə verdiyi töhfələr Fransa prezidenti Makronun regionda dağıdıcı siyasi fəaliyyətinə qarşı olub:
"Ümumi olaraq, Avropa İttifaqı Şurasının Siyasi və Təhlükəsizlik Komitəsi Ermənistanda missiyasına davam edərək Azərbaycanla münasibətlərin normallaşmasına dəstək verir. Aİ Ermənistan və Azərbaycan liderlərinin danışıqlar masasına oturmasını sürətləndirmək üçün məhsuldar addımlar atıb. Həmçinin ölkələr arasında beynəlxalq sərhədin tanınması və təyin edilməsi üçün bir sıra təkliflər irəli sürüb. Avropa İttifaqı Şurasının prezidenti Çarlz Mişelin prezident İlham Əliyev və baş nazir Nikol Paşinyan ilə görüşləri xüsusi əhəmiyyət kəsb edir.
Bundan əlavə Almaniya kansleri Olaf Şoltz və Xarici İşlər Naziri Annalena Bayerbok tərəfindən hazırlanmış görüşlər Azərbaycan və Ermənistan arasında məhsuldar danışıqların baş tutmasını təmin edib. Bu görüşlər Fransa prezidenti Emmanuel Makronun sülhü pozan çıxışlarına mane olub”.
Fərid Akhund